گروگرام پولس انکاؤنٹر :چار بدمعاش ہلاک، ایک زخمی، تین پولس اہلکاروں کو لگیں گولیاں

پنچکولا: سشانت لوک فیز-II علاقے میں گروگرام پولس کرائم برانچ کے ساتھ ہوئے ایک انکاؤنٹر میں چار مبینہ مسلح بدمعاش ہلاک اور ایک زخمی ہو گیا۔ ہریانہ پولس کے ترجمان نے جمعرات کو بتایا کہ فائرنگ کے اس تبادلے کے دوران گروگرام پولس کے تین اہلکار بھی گولی لگنے سے زخمی ہوئے ہیں۔

ترجمان کے مطابق، پولس کنٹرول روم کو یہ اطلاع ملنے کے بعد کہ مسلح بدمعاشوں سے بھری ایک مشکوک اسکارپیو گاڑی سشانت لوک فیز-II میں داخل ہوئی ہے، کرائم برانچ کی ٹیمیں فوراً اس علاقے کی طرف روانہ ہوئیں۔ جب پولس کی ٹیمیں موقع پر پہنچیں تو مشتبہ بدمعاشوں نے مبینہ طور پر ایک تاجر کی رہائش گاہ پر جدید ترین ہتھیاروں سے فائرنگ شروع کر دی تھی۔

رپورٹ کے مطابق مذکورہ تاجر کو بیرون ملک سے سرگرم ایک مطلوب گینگسٹر کی جانب سے مسلسل جبرا ً وصولی کے پیغامات موصول ہو رہے تھے۔ کرائم برانچ کی ٹیموں نے مسلح حملہ آوروں کو خود سپردگی کی وارننگ دی، تاہم مشتبہ بدمعاشوں نے مبینہ طور پر پولس پر اندھا دھند فائرنگ کر دی اور فرار ہونے کی کوشش کی۔ پولس نے اپنے دفاع میں اور ملزمان کو پکڑنے کے مقصد سے جوابی کارروائی کی۔

فائرنگ کے اس تبادلے کے دوران تمام پانچوں مبینہ شوٹرز کو گولیاں لگیں۔ انہیں فوری طور پر ایک پرائیویٹ سپر اسپیشلٹی ہسپتال منتقل کیا گیا، جہاں ڈاکٹروں نے ان میں سے چار کو مردہ قرار دے دیا۔ پانچواں ملزم زیر علاج ہے۔

ترجمان نے بتایا کہ انکاؤنٹر کے دوران گروگرام پولس کے تین اہلکار بھی گولی لگنے سے زخمی ہوئے۔ انہیں فوری طور پر ہسپتال لے جایا گیا جہاں ان کا علاج چل رہا ہے۔ ڈاکٹروں کی جانب سے ان کی حالت پر مسلسل نظر رکھی جا رہی ہے۔

ترجمان نے کہا کہ قانون کے مطابق قانونی کارروائی شروع کر دی گئی ہے۔ ہلاک اور زخمی ہونے والے ملزمان کی شناخت، ان کے مجرمانہ پس منظر، موقع سے برآمد ہونے والے ہتھیاروں اور دیگر اہم تفصیلات کی تصدیق اور تفتیش مکمل ہونے کے بعد علیحدہ طور پر معلومات فراہم کی جائیں گی۔