یو اے ای میں شدید دھند، حد نگاہ انتہائی کم، ریڈ اور یلو الرٹ جاری

ابوظہبی :  متحدہ عرب امارات (یو اے ای) کے مختلف علاقوں میں شدید دھند کے باعث حد نگاہ انتہائی کم ہوگئی جس کے بعد حکام نے شہریوں کےلیے ریڈ اور یلو الرٹ جاری کر دیے۔

اماراتی محکمہ موسمیات نے متعدد علاقوں میں ریڈ اور یلو الرٹ جاری کیے ہیں جن میں 3 جنوری بروز ہفتہ صبح ساڑھے 10 بجے تک حد نگاہ کم رہنے کا امکان ظاہر کیا گیا ہے۔

عرب میڈیا کی رپورٹ کے مطابق امارات میں کچھ مقامات پر حد نگاہ ہزار میٹر تک کم ہو گئی ہے، جس کی وجہ سے ابوظبی پولیس نے کئی بڑی سڑکوں پر 80 کلو میٹر فی گھنٹہ کی رفتار کی حد کو کم کر دیا ہے۔

دبئی اور ابوظبی میں پولیس نے شہریوں کو انتہائی محتاط انداز میں ڈرائیونگ کرنے کی ہدایت کی ہے اور خلاف ورزی پر قانونی کارروائی کرنے کی وارننگ جاری کی ہے