حیدرآباد میں شدید بارش کی توقع۔جلدی لاگ آؤٹ کا منصوبہ تیارکرنے پولیس کی آئی ٹی ملازمین سے درخواست
تلنگانہ کی سائبرآباد ٹریفک پولیس نے منگل کو متوقع شدید بارش کے پیش نظر آئی ٹی کوریڈور اور قریبی علاقوں میں کمپنیوں اور ملازمین سے درخواست کی ہے کہ وہ سہ پہر 3 بجے سے ہی جلدی لاگ آؤٹ کا منصوبہ بنائیں۔
حیدرآباد: تلنگانہ کی سائبرآباد ٹریفک پولیس نے منگل کو متوقع شدید بارش کے پیش نظر آئی ٹی کوریڈور اور قریبی علاقوں میں کمپنیوں اور ملازمین سے درخواست کی ہے کہ وہ سہ پہر 3 بجے سے ہی جلدی لاگ آؤٹ کا منصوبہ بنائیں۔
ایڈوائزری کے مطابق اس اقدام کا مقصد ٹریفک جام سے بچاؤ، عوامی تحفظ کو یقینی بنانا اور ایمرجنسی سروسس کی ہموار آمد و رفت کو ممکن بنانا ہے۔ پولیس نے تجویز دی ہے کہ تمام دفاتر ایک ساتھ بند کرنے کے بجائے مرحلہ وار چھٹی دی جائے تاکہ بارش کے دوران اہم سڑکوں اور چوراہوں پر بوجھ کم ہو۔
ایڈوائزری میں کہا گیا، ’’جلد چھٹی دینے سے ہجوم کم ہوگا اور ہجوم کے وقت اچانک بارش سے پیدا ہونے والے ٹریفک کے مساءل سے بچا جا سکے گا۔ ہم تمام آجرین سے تعاون کی اپیل کرتے ہیں۔‘‘
یہ انتباہ اس وقت جاری کیا گیا ہے جب محکمہ موسمیات نے شام کے وقت تیز ہواؤں کے ساتھ شدید بارش کی پیش گوئی کی ہے۔
