دبئی میں گرج چمک کے ساتھ موسلادھار بارش، ورک فرام ہوم نافذ

دبئی: دبئی کے مختلف علاقوں میں گرج چمک کے ساتھ موسلادھار بارش کے بعد معمولاتِ زندگی متاثر ہوگئے ہیں۔

عرب میڈیا کے مطابق دبئی میں گزشتہ روز سے گرج چمک کے ساتھ موسلادھار بارش کا سلسلہ جاری ہے، انتظامیہ نے خراب موسمی صورتحال کے پیش نظر ریموٹ ورک پالیسی نافذ کردی ہے۔

حکام نے صرف انتہائی ضروری عملے کو ہی دفاتر میں حاضری دینے کی ہدایت کی ہے، گلوبل ولیج اور پبلک پارکس کو بھی بند کر دیا گیا، خراب موسم کے باعث فلائٹ آپریشن بھی متاثر ہوا، دبئی ائیرپورٹ پر آنے اور جانے والی متعدد پروازیں منسوخ اور کئی تاخیر کا شکار ہیں۔

محکمہ موسمیات کی جانب سے دبئی اور ابو ظبی میں شدید موسم کی وارننگ بھی جاری کی گئی ہے، خراب موسم کے باعث دبئی کے معروف تفریحی مقام عین دبئی کو عارضی طور پر بند کر دیا گیا ہے جبکہ اسکائی ڈائیو کی تمام سرگرمیاں بھی معطل کر دی گئیں۔