وزیر داخلہ امیت شاہ کا دورہ چھتیس گڑھ، 86 نکسلیوں نے خودسپردگی اختیار کرلی

بستر/حیدرآباد: مرکزی وزیر داخلہ امیت شاہ کے چھتیس گڑھ کے بستر کے دورے کے درمیان ہفتہ کو تلنگانہ کے بھدرادری کتہ گوڑم ضلع میں ماؤنواز تنظیم کو ایک اور دھچکا دیتے ہوئے 86 نکسلیوں نے اجتماعی طور پر خودسپردگی کی۔ ان میں سے زیادہ تر کا تعلق چھتیس گڑھ سے ہے۔

معلومات کے مطابق نکسلیوں کتہ گوڑم میں ہیم چندر پورم پولیس ہیڈکوارٹر پہنچ کر ملٹی زون-1 کے انسپکٹر جنرل آف پولیس (آئی جی) چندر شیکھر ریڈی کے سامنے خودسپردگی کی۔ ہتھیار ڈالنے والوں میں 66 مرد اور 20 خواتین شامل ہیں۔

یہ تمام ماؤنواز طویل عرصے سے آئی ای ڈی دھماکوں، فائرنگ، قتل اور ٹھیکیداروں سے بھتہ وصولی جیسے سنگین واقعات میں شامل رہےہیں۔

آئی جی چندر شیکھر ریڈی نے کہا کہ ان تمام نے حکومت تلنگانہ کے ذریعہ چلائے جارہے ‘آپریشن چیوتھا’ کے تحت ہتھیار ڈال دیے ہیں۔ حکومت نے بازآبادکاری اسکیم کے تحت ہتھیار ڈالنے والے نکسلیوں کو 25,000 روپے کی فوری امداد بھی فراہم کی ہے۔