جوبلی ہلز میں پانی کے غیر ضروری استعمال پر ہوٹل کو 20 ہزار روپے جرمانہ

حیدرآباد واٹر بورڈ نے جوبلی ہلز میں احاطے کی صفائی کے دوران پانی کے غیر ضروری استعمال پر اناگانا ہوٹل کو 20 ہزار روپے جرمانہ عائد کیا ہے۔

پانی کے ضیاع کا یہ معاملہ حیدرآباد میٹروپولیٹن واٹر سپلائی اینڈ سیوریج بورڈ کے منیجنگ ڈائریکٹر کے اشوک ریڈی کی نظر میں اس وقت آیا جب وہ جوبلی ہلز مین روڈ سے گزر رہے تھے۔

انہوں نے روڈ نمبر 45 پر پلاٹ نمبر 775-جی میں واقع ہوٹل کے احاطے کی صفائی کے لیے بڑی مقدار میں پانی استعمال ہوتے دیکھا اور فوری طور پر متعلقہ حکام کو نوٹس جاری کرنے اور جرمانہ عائد کرنے کی ہدایت دی۔

ایم ڈی کی ہدایت پر عہدیداروں نے کے گایتری ریڈی پر 20 ہزار روپے جرمانہ عائد کیا اور رقم وصول کرلی۔

واٹر بورڈ نے واضح کیا ہے کہ پانی کے غیر ضروری استعمال اور ضیاع کو روکنے کے لیے قواعد کے مطابق سخت کارروائی کی جائے گی، خاص طور پر پینے کے پانی کے غلط استعمال پر بھی نظر رکھی جارہی ہے۔

کے اشوک ریڈی نے کہا کہ پانی ایک قیمتی قدرتی وسیلہ ہے اور اسے غیر ضروری کاموں کے لیے بے دریغ استعمال نہیں کیا جانا چاہیے۔

انہوں نے عوام اور تجارتی اداروں سے اپیل کی کہ احاطوں، سڑکوں اور دیگر مقامات کی صفائی کے دوران پانی کے ضرورت سے زیادہ استعمال سے گریز کریں۔ انہوں نے کہا کہ پانی کا تحفظ ہر شہری کی ذمہ داری ہے اور اس سلسلے میں عوامی شعور میں اضافہ ضروری ہے۔