ووٹر سلپس گھر گھر تقسیم کا کام قبل ازوقت مکمل کرلیا جائے:رونالڈ روز

حیدرآباد: ڈسٹرکٹ الیکشن آفیسر و کمشنر جی ایچ ایم سی رونالڈ روز نے سیکٹر آفیسرس کو ہدایت دی ہے کہ وہ متعلقہ حلقوں میں ووٹر انفارمیشن سلپس قبل ازوقت گھر گھر تقسیم کا کام مکمل کرلیں۔

وہ آج سیکٹر آفیسرس اور ماسٹرس ٹرینرس کے ٹریننگ پروگرام سے خطاب کررہے تھے۔ انہوں نے سیکٹر آفیسرس کو ہدایت دی کہ وہ ووٹر سلپس کی تقسیم بوتھ لیول آفیسر کے ذریعہ کروائیں اور اس کی اطلاع بی ایل او ایپ کے ذریعہ ریٹرننگ آفیسرس کو دیں۔

الیکشن کمیشن نے 80 سال عمر کے رائے دہندوں کو ان کے مکان پر رائے دہی کی سہولت فراہم کی ہے۔

سیکٹر آفیسر کو چاہئے کہ وہ پولنگ ایجنٹ کی موجودگی میں ضعیف ووٹرس کو سہولت فراہم کریں اور رائے دہی کے بعد ان کی انگلی پر سیاہی کا نشان لگائیں۔

اگر کوئی معذور ہے تو رائے دہندے کے ساتھ موجود شخص کی انگلی پر نشان نہ لگائیں۔ انہوں نے سیکٹر آفیسرس کو ہدایت دی کہ وہ پولنگ آفیسرس کو ای وی ایم مشین ودیگر سامان حوالے کرتے وقت ڈسٹریبوشن سنٹر پر موجود رہیں۔ اس پروگرام میں کلکٹر حیدرآباد اور زونل کمشنرس موجود تھے۔