حیدر آباد کے 5 لاکھ 41 ہزار بوگس ووٹ فہرست سے حذف

حیدر آباد: ڈسٹرکٹ الیکشن آفیسر رونالڈ روز نے بتایا کہ حیدر آباد میں غیر جانبدار اور آزادانہ انتخابات کے انعقاد کے لئے الیکشن مشنری فہرست رائے دہندگان کو صاف و شفاف بنانے متحرک ہوچکی ہے۔

بالخصوص شہر کی فہرست رائے دہندگان سے بوگس، نقل مقام اور انتقال کر گئے رائے دہندوں کے ناموں کو حذف کیا جارہا ہے۔ اس کے لئے بوتھ لیول آفیسرس اور ای آر اوز و دیگر انتخابی عملہ سرگرم عمل ہوچکا ہے۔

تاحال حیدر آباد ضلع کے 15 اسمبلی حلقہ جات کے منجملہ 47,141 مہلوکین، 4,39,801 نقل مقام ووٹرس اور 54,259 بوگس ووٹوں کو فہرست رائے دہندگان سے حذف کردیا گیا ہے۔

اس طرح الیکشن کمیشن کی ہدایت پر حیدر آباد سے 5 لاکھ 41 ہزار 204 ووٹرس کے ناموں کو فہرست رائے دہندگان سے حذف کردیا گیا۔

یہ تمام نام الیکشن کمیشن کے قواعد کے مطابق حذف کئے گئے ہیں۔ اس کے علاوہ حیدر آباد میں 1,81,405 ووٹرس کی نشاندہی کرتے ہوئے ان کے مکانات کے نمبرات کی تصحیح کی گئی۔

اس دوران حیدر آباد میں رائے دہی کے تناسب میں اضافہ کے لئے ایک ہی خاندان کے ووٹرس کی سہولت کے لئے تمام ووٹرس کو ایک ہی پولنگ پر ووٹ ڈالنے کی سہولت فراہم کی جارہی ہے۔

اس طرح 3,78,713 رائے دہندے جو بچھڑے ہوئے تھے انہیں ایک پولنگ بوتھ پر ووٹ ڈالنے کے مواقع فراہم کئے گئے ہیں۔