جعلی ایچ ٹی کپاس کے بیجوں کا بڑا بھانڈا، 10 ٹن بیج ضبط، دو ملزمان گرفتار
نارائن پیٹ ضلع میں جعلی بیجوں کے غیر قانونی کاروبار کے خلاف پولیس اور محکمہ زراعت نے بڑی کارروائی انجام دیتے ہوئے تقریباً ایک کروڑ روپے مالیت کے 10 ٹن (100 کوئنٹل) جعلی ایچ ٹی کپاس کے بیج ضبط کر لیے ہیں۔ اس سلسلے میں دو افراد کو گرفتار کر کے ان کے خلاف مقدمات درج کیے گئے ہیں۔
نارائن پیٹ ضلع میں جعلی بیجوں کے غیر قانونی کاروبار کے خلاف پولیس اور محکمہ زراعت نے بڑی کارروائی انجام دیتے ہوئے تقریباً ایک کروڑ روپے مالیت کے 10 ٹن (100 کوئنٹل) جعلی ایچ ٹی کپاس کے بیج ضبط کر لیے ہیں۔ اس سلسلے میں دو افراد کو گرفتار کر کے ان کے خلاف مقدمات درج کیے گئے ہیں۔
یہ بات ضلع ایس پی ڈاکٹر ونیت (آئی پی ایس) نے ایس پی آفس میں منعقدہ پریس کانفرنس کے دوران بتائی۔ انہوں نے واضح انتباہ دیتے ہوئے کہا کہ جعلی بیجوں کے کاروبار میں ملوث افراد چاہے وہ نقل و حمل، سپلائی یا مہنگے داموں فروخت میں شامل ہوں، سب کے خلاف قانون کی سخت دفعات کے تحت کارروائی کی جائے گی اور انہیں عدالت کے کٹہرے میں کھڑا کیا جائے گا۔
ایس پی کے مطابق 25 جنوری کی شام نارائن پیٹ منڈل کے بند گونڈہ گاؤں اور کوٹھاپلی منڈل کے بھونیڈ گاؤں میں ضلع پولیس، ٹاسک فورس اسپیشل ٹیم اور محکمہ زراعت نے مشترکہ طور پر چھاپے مارے۔ ان کارروائیوں کے دوران جعلی ایچ ٹی کپاس کے بیج اور بڑی تعداد میں سیڈ پیکٹس برآمد کیے گئے۔ اس معاملے میں وی بالکرشنا نائیڈو اور ششی وردھن نائیڈو (ساکنان بھونیڈ گاؤں، کوٹھاپلی منڈل) کو گرفتار کیا گیا۔
پولیس نے اس سلسلے میں نارائن پیٹ دیہی پولیس اسٹیشن اور مدور پولیس اسٹیشن میں دو الگ الگ مقدمات درج کیے ہیں۔ ابتدائی تفتیش میں انکشاف ہوا ہے کہ ملزمان جعلی کپاس کے بیج غیر قانونی طور پر منتقل کر رہے تھے اور نارائن پیٹ ضلع کے کسانوں کو اونچی قیمتوں پر فروخت کر کے بھاری منافع کما رہے تھے۔ مزید یہ کہ مرکزی ملزم وی بالکرشنا نائیڈو اس سے قبل بھی مدور، ناروا اور دولت آباد پولیس اسٹیشن حدود میں اسی نوعیت کے مقدمات میں ملوث پایا گیا ہے۔
ایس پی ڈاکٹر ونیت نے کسانوں سے اپیل کی کہ وہ غیر پیک شدہ یا مشکوک بیج ہرگز نہ خریدیں اور جعلی بیجوں کی فروخت کی اطلاع فوری طور پر پولیس یا محکمہ زراعت کے عہدیداروں کو دیں۔
اس موقع پر ضلع زرعی افسر جان سدھاکر نے بتایا کہ ضبط شدہ جعلی کپاس کے بیج تقریباً تین منڈلوں میں فصل بونے کے لیے کافی مقدار میں ہیں، جس سے کسانوں کو بڑے نقصان کا اندیشہ تھا۔ انہوں نے کسانوں کو مشورہ دیا کہ وہ صرف تسلیم شدہ زرعی دکانوں سے بیج خریدیں، بل ضرور حاصل کریں اور لاٹ نمبر کی جانچ کریں۔
آخر میں ضلع ایس پی نے اس کامیاب کارروائی پر ڈی ایس پی این لنگیا کی نگرانی میں کام کرنے والی پولیس ٹیم، ٹاسک فورس، خصوصی پولیس ٹیم اور محکمہ زراعت کے عہدیداروں کو مبارکباد دی، جن کی بروقت کارروائی سے کسانوں کو بڑے نقصان سے بچایا جا سکا۔
