مندر جانے کے بہانے شوہر کا قتل، بیوی، مبینہ عاشق اور دو ساتھی گرفتار

وشاکھاپٹنم: آندھرا پردیش کے ضلع چتور میں ایک دل دہلا دینے والا قتل کا معاملہ سامنے آیا ہے، جہاں اماوسیا کے موقع پر مندر میں درشن کے بہانے ایک نوجوان کو مبینہ طور پر منصوبہ بندی کے تحت قتل کر دیا گیا۔ پولیس نے مقتول کی بیوی، اس کے مبینہ عاشق اور دو دیگر ملزمان کو گرفتار کر لیا ہے۔

پولیس کے مطابق 23 سالہ رمیش، جو تمل ناڈو کے کرشناگیری ضلع کا رہائشی تھا، کی شادی تقریباً دو سال قبل 19 سالہ ہاسنی سے ہوئی تھی۔ دونوں کی ایک کم سن بیٹی بھی ہے، جبکہ رمیش ہوسور کی ایک نجی کمپنی میں ملازمت کرتا تھا۔

تحقیقات کے مطابق شادی کے بعد بھی ہاسنی کا اپنے بچپن کے دوست 20 سالہ یوگندھر سے تعلق برقرار رہا، اور دونوں نے مل کر رمیش کو قتل کرنے کی سازش رچی۔

پولیس کا کہنا ہے کہ ہاسنی نے شوہر کو اماوسیا کے موقع پر شری ملیشورا سوامی مندر جانے کے لیے راضی کیا۔ سفر کے دوران وہ مبینہ طور پر اپنے موبائل فون کے ذریعے مسلسل اپنی لائیو لوکیشن یوگندھر کو بھیجتی رہی، تاکہ وہ ان کی نقل و حرکت پر نظر رکھ سکے۔

پولیس کے مطابق پہاڑی راستے کے ایک موڑ پر ہاسنی نے جان بوجھ کر اپنا بیگ گرا دیا، جس پر رمیش نے موٹر سائیکل روک دی۔ اسی دوران یوگندھر اور اس کے ساتھی وہاں پہنچ گئے، رمیش کا تعاقب کرتے ہوئے قریب کے جنگل میں لے گئے اور تیز دھار ہتھیاروں سے حملہ کر کے اسے قتل کر دیا۔ بتایا گیا ہے کہ یہ واردات اس وقت پیش آئی جب ان کی کم سن بیٹی بھی قریب موجود تھی۔

پولیس نے بتایا کہ جب ہاسنی اور اس کی بیٹی گھر واپس نہیں پہنچیں تو ہاسنی کی والدہ نے شکایت درج کرائی، جس کے بعد تحقیقات شروع کی گئیں۔

تحقیقات کے دوران سی سی ٹی وی فوٹیج، موبائل فون ریکارڈ، لوکیشن ڈیٹا اور دیگر تکنیکی شواہد کی مدد سے پولیس نے چند ہی گھنٹوں میں قتل کی سازش بے نقاب کر دی۔ سی سی ٹی وی میں دیکھا گیا کہ رمیش اپنی بیوی کے ساتھ مندر جا رہا تھا، لیکن بعد میں ہاسنی اسی موٹر سائیکل پر دو افراد کے ساتھ وہاں سے نکلتی ہوئی نظر آئی۔

پولیس نے مقتول کی بیوی، اس کے مبینہ عاشق اور دو دیگر ملزمان کو گرفتار کر لیا ہے۔ اس کے علاوہ پولیس اس بات کی بھی تحقیقات کر رہی ہے کہ آیا شادی کے وقت ہاسنی نابالغ تھی یا نہیں۔ اگر یہ بات درست ثابت ہوئی تو اس معاملے میں کم عمری کی شادی سے متعلق قوانین کے تحت بھی الگ کارروائی کی جائے گی۔