حیدرآباد: بیگم پیٹ فلائی اوور کی دیوار سے بے قابو کار ٹکراگئی۔ خاتون اور کار ڈرائیور زخمی

حیدرآباد: شہرحیدرآباد کے بیگم پیٹ فلائی اوور کی دیوار سے ایک بے قابو کار ٹکراگئی جس کے نتیجہ میں خاتون اور کار ڈرائیور زخمی ہوگیااورحادثہ کے ساتھ ہی بیگم پیٹ فلائی اوور پر بڑے پیمانہ پر ٹریفک جام ہوگئی۔

تفصیلات کے مطابق یہ کار تیزرفتاری کے ساتھ پنجہ گٹہ سے سکندرآباد کی سمت جارہی تھی کہ اس کے ڈرائیور نے اس کا توازن کھودیا اوریہ کار فلائی اوور کے ڈیوائیڈر سے ٹکراگئی۔

بعد ازاں کار نے ٹراویلس بس کو ٹکر دے دی اور پھر فلائی اوور کی دیوار سے ٹکراگئی۔

اس حادثہ میں کار کو شدید نقصان پہنچااورکار ڈرائیورکے بشمول خاتون زخمی ہوگئی۔اطلاع ملتے ہی پولیس وہاں پہنچی جس نے زخمیوں کو علاج کیلئے اسپتال منتقل کردیا۔

پولیس نے حادثہ کا سبب بننے والی کار کو وہاں سے ہٹاتے ہوئے بیگم پیٹ فلائی اوور بریج کوٹریفک کیلئے بحال کردیا۔پولیس نے اس سلسلہ میں ایک معاملہ درج کرکے جانچ شروع کردی۔