حیدرآباد: کار نے ڈیوٹی پر موجود کانسٹیبل کو روند ڈالا، ویڈیو وائرل

حیدرآباد: گوپال پورم پولیس اسٹیشن سے وابستہ ایک پولیس کانسٹیبل منگل کی رات ہٹ اینڈ رن کیس میں شدید زخمی ہوگیا۔ پولیس نے یہ بات بتائی۔

کانسٹیبل مہیش، الوگڈہ باوی روڈ میٹو گوڑہ پر گاڑیوں کی چیکنگ ڈیوٹی پر تھا۔ جب اس نے ایک گاڑی کو روکنے کی کوشش کی تو ایک تیز رفتار کار نے اسے ٹکر مار دی اور اسے روندتے ہوئے آگے نکل گئی۔

اس واقعے کی سی سی فوٹیج کچھ لوگوں نے سوشل میڈیا پلیٹ فارم پر پوسٹ کی جو جلد ہی وائرل ہو گئی۔

ویڈیو میں کانسٹیبل مہیش سڑک پر اپنے ایک ساتھی کے ساتھ ڈیوٹی پر نظر آرہا ہے۔ ایک کار کو آتا دیکھ کر وہ اسے روکنے کے لئے سڑک کے بیچ میں جاتا ہے۔

کار ڈرائیور بظاہر گاڑی روکنے پر عدم آمادہ، گاڑی کو زگ زاگ انداز میں چلاتے ہوئے کانسٹیبل کو ٹکر مار دیتا ہے جس پر وہ زمین پر گر پڑتا ہے اور کار اسے روند کر تیزی سے آگے نکل جاتی ہے۔  

موقع پر موجود مہیش کے ساتھیوں نے اسے اسپتال منتقل کیا جہاں اس کا علاج چل رہا ہے۔