حیدرآباد سے فوکٹ جانے والی پرواز کا حادثہ ٹل گیا، 133 مسافر محفوظ

حیدرآباد: حیدرآباد سے تھائی لینڈ کے شہر فوکٹ جانے والی ایئر انڈیا کی ایک پرواز بڑے حادثے سے بال بال بچ گئی۔ اطلاعات کے مطابق طیارہ جب فوکٹ ایئرپورٹ کے رن وے پر لینڈنگ کر رہا تھا تو اچانک اس کا لینڈنگ گیئر ٹوٹ گیا، جس کے باعث کچھ دیر کے لیے خطرناک صورتحال پیدا ہو گئی۔

عینی شاہدین کے مطابق طیارہ رن وے پر تیزی سے اور قدرے سختی کے ساتھ اترا، جس کے نتیجے میں لینڈنگ گیئر کو نقصان پہنچا۔ تاہم پائلٹ کی مہارت اور بروقت اقدامات کے باعث طیارہ قابو میں رہا اور اسے محفوظ طریقے سے روک لیا گیا۔

حکام کے مطابق اس پرواز میں عملے سمیت 133 افراد سوار تھے اور خوش قسمتی سے تمام مسافر محفوظ رہے۔ واقعہ کے فوراً بعد ایئرپورٹ کے ہنگامی عملے اور ریسکیو ٹیمیں موقع پر پہنچ گئیں اور احتیاطی تدابیر کے طور پر مسافروں کو بحفاظت طیارے سے باہر نکال لیا گیا۔

ایئرپورٹ حکام نے بتایا کہ واقعہ کے بعد رن وے پر کچھ دیر کے لیے آپریشن متاثر ہوا جبکہ متعلقہ تکنیکی ٹیم نے طیارے کا معائنہ شروع کر دیا ہے۔ ابتدائی طور پر اس واقعہ کی وجہ لینڈنگ کے دوران اچانک جھٹکا یا تکنیکی خرابی بتائی جا رہی ہے، تاہم اصل وجوہات جاننے کے لیے تحقیقات شروع کر دی گئی ہیں۔

ایئر انڈیا کے حکام نے بھی اس واقعہ کی تصدیق کرتے ہوئے کہا ہے کہ مسافروں کی حفاظت اولین ترجیح ہے اور واقعہ کی مکمل جانچ کی جائے گی۔