حیدرآباد :حمایت ساگر سے پانی کا اخراج ۔ او۔آر۔آر سروس روڈ بند
محکمہ موسمیات کی پیش گوئی کے مطابق آئندہ دنوں مزید بارش کے امکانات ہیں جس کے پیش نظر پانی کا اخراج جاری رہے گا۔ قریبی دیہات اور نشیبی علاقوں کے عوام کو انتظامیہ نے الرٹ رہنے کی ہدایت دی ہے۔
حیدرآباد: حیدرآباد کے حمایت ساگر سے پانی کے اخراج کے باعث قریبی او۔آر۔آر سروس روڈ کو پولیس نے حفاظتی اقدام کے طور پر بند کر دیا ہے۔
راجندر نگر سے حُمایت ساگر کی طرف جانے والی اس سڑک پر ہر قسم کی ٹریفک کو روک دیا گیا ہے تاکہ کسی بھی ناخوشگوار واقعہ سے بچا جا سکے۔ واٹر سپلائی بورڈ کے حکام کے مطابق پروجیکٹ کے چار دروازے اُٹھا کر پانی نچلی جانب چھوڑا جا رہا ہے، جن میں سے دو دروازے ایک فٹ اور باقی دو دروازے دو فٹ تک اُٹھائے گئے ہیں۔
حُمایت ساگر کی مکمل گنجائش 1763.5 فٹ ہے جبکہ موجودہ پانی کی سطح 1763 فٹ تک پہنچ چکی ہے۔
محکمہ موسمیات کی پیش گوئی کے مطابق آئندہ دنوں مزید بارش کے امکانات ہیں جس کے پیش نظر پانی کا اخراج جاری رہے گا۔ قریبی دیہات اور نشیبی علاقوں کے عوام کو انتظامیہ نے الرٹ رہنے کی ہدایت دی ہے۔
ریسکیو ٹیمیں اور پولیس ملازمین مسلسل صورتحال پر نظر رکھے ہوئے ہیں۔ مقامی افراد کو مویشیوں اور قیمتی سامان کو محفوظ مقامات پر منتقل کرنے کی تاکید کی گئی ہے۔
اس کے ساتھ ساتھ ٹریفک پولیس نے شہریوں سے اپیل کی ہے کہ وہ متبادل راستوں کا استعمال کریں اور سروس روڈ پر جانے کی کوشش نہ کریں۔
