حیدرآباد کی تاریخی جھیل ’’ بم رکن الدولہ‘‘ کو اب عوام کیلئے کھول دیا گیا، چیف منسٹر کے ہاتھوں افتتاح

حیدرآباد: تلنگانہ کے چیف منسٹر اے ریونت ریڈی نے شیو رام پلی میں واقع تاریخی بم رکن الدولہ جھیل کا افتتاح کیا جو شہر میں جھیلوں کی بحالی کے منصوبے کے تحت دوبارہ زندہ کی گئی ہے۔ اس جھیل کی بحالی ہائیڈرا (HYDRAA) کی جانب سے کی گئی ہے جو حیدرآباد کی جھیلوں اور آبی ذخائر کو محفوظ بنانے کے لیے بڑے پیمانے پر کام کر رہی ہے۔

افتتاحی تقریب میں حیدرآباد رکن پارلیمنٹ اسدالدین اویسی، بہادر پورہ کے رکن اسمبلی محمد مبین، رکن قانون ساز کونسل مرزا رحمت بیگ اور ہائیڈرا کمشنر اے وی رنگناتھ نے شرکت کی۔ افتتاح سے قبل چیف منسٹر نے جھیل کے اطراف قائم اسٹالز کا بھی معائنہ کیا۔

حکام کے مطابق یہ جھیل اصل میں 104 ایکڑ پر پھیلی ہوئی تھی، مگر وقت کے ساتھ ساتھ غیر قانونی قبضوں اور شہری توسیع کی وجہ سے اس کا رقبہ کم ہوتا گیا۔ بعد میں ایچ ایم ڈی اے کے ریکارڈ میں اس کا رقبہ 17.05 ایکڑ درج تھا جبکہ بحالی سے قبل صرف 4.12 ایکڑ حصہ باقی رہ گیا تھا۔ اگست 2024 میں ہائیڈرا نے غیر قانونی قبضے ہٹا کر جھیل کو اس کے سرکاری رقبے تک بحال کیا۔

بحالی کے منصوبے کے تحت جھیل کے بند کو روایتی پتھروں سے مضبوط کیا گیا، واکنگ ٹریک، اوپن جم، بچوں کے کھیلنے کے مقامات، بزرگوں کے لیے بیٹھنے کی جگہیں اور سایہ دار و دواؤں کے درختوں کی شجرکاری کی گئی۔ جھیل تک رسائی کے لیے تین داخلی راستے بنائے گئے ہیں جبکہ نگرانی کے لیے سی سی ٹی وی نظام بھی نصب کیا گیا ہے۔

حکام نے بتایا کہ جھیل میں ایسے خصوصی راستے بنائے گئے ہیں جن کے ذریعے راجندر نگر اور آرام گھر کے علاقوں سے آنے والا بارش کا پانی جھیل میں داخل ہوگا جس سے سیلاب کے خطرات کم ہوں گے۔ بحال شدہ جھیل اب شہریوں کے لیے تفریحی اور ماحولیاتی مقام کے طور پر استعمال ہوگی۔

بم رکن الدولہ جھیل کی بحالی ہائیڈرا کے پہلے مرحلے کے منصوبے کا حصہ ہے جس میں چھ جھیلوں کی ترقی شامل ہے۔

بتکما کنٹا کا افتتاح گزشتہ سال 28 ستمبر کو کیا گیا تھا جبکہ کوکٹ پلی نالا چیروو جھیل کو بھی جلد عوام کے لیے کھولنے کی تیاری کی جا رہی ہے۔ حکام کے مطابق مزید تین جھیلوں پر کام جاری ہے اور دوسرے مرحلے میں 14 مزید جھیلوں کی بحالی کا منصوبہ تیار کیا گیا ہے۔