گولکنڈہ قلعہ کے کٹورا ہاؤس کی بحالی کے لیے حائیڈرا کا مکمل تعاون، کمشنر اے وی رنگناتھ
گولکنڈہ قلعہ کے احاطے میں واقع 450 سالہ قدیم اور تاریخی آبی ذخیرے ’’کٹورا ہاؤس‘‘ کی بحالی اور تحفظ کے لیے حائیڈرا (HYDRAA) کی جانب سے مکمل تعاون فراہم کیا جائے گا۔ یہ بات حائیڈرا کے کمشنر اے وی رنگناتھ نے کہی۔
گولکنڈہ قلعہ کے احاطے میں واقع 450 سالہ قدیم اور تاریخی آبی ذخیرے ’’کٹورا ہاؤس‘‘ کی بحالی اور تحفظ کے لیے حائیڈرا (HYDRAA) کی جانب سے مکمل تعاون فراہم کیا جائے گا۔ یہ بات حائیڈرا کے کمشنر اے وی رنگناتھ نے کہی۔
انہوں نے اس امر پر مسرت کا اظہار کیا کہ نرمان این جی او نے اس قدیم ورثے کے تحفظ کے لیے عملی قدم اٹھایا ہے، جو قابلِ تحسین اور حوصلہ افزا ہے۔ بدھ کے روز کمشنر نے کٹورا ہاؤس کا میدانی سطح پر معائنہ کیا، جو اس وقت مرکزی محکمہ آثارِ قدیمہ کی نگرانی میں ہے، اور بحالی کے لیے درکار اقدامات کا تفصیلی جائزہ لیا۔
اس موقع پر نرمان این جی او کی نمائندہ اور منصوبے کی نگران محترمہ کلپنا رمیش کے ساتھ محکمہ آثارِ قدیمہ کے عہدیداروں نے کمشنر کو جاری اور مجوزہ حفاظتی اقدامات سے آگاہ کیا۔ ان اقدامات میں تالاب میں کچرا ڈالنے سے روکنے کے لیے بلند آہنی باڑ کی تنصیب اور اطراف میں پیدل راستے کی ترقی شامل ہے۔
عہدیداروں نے کٹورا ہاؤس کی مؤثر بحالی اور دیرپا تحفظ کے لیے حائیڈرا سے بھرپور تعاون کی درخواست کی، جس پر کمشنر نے یقین دہانی کرائی کہ اس تاریخی آبی ذخیرے کے تحفظ اور سابقہ خوبصورتی کی بحالی کے لیے ہر ممکن مدد فراہم کی جائے گی۔
