دہلی میں تبدیلی کیلئے پارلیمانی انتخابات میں بھی کانگریس کی حمایت کرناچاہتاہوں:پروفیسر کودنڈارام

حیدرآباد: تلنگانہ جناسمیتی کے سربراہ پروفیسر کودنڈارام نے گورنر کوٹہ کے تحت انہیں رکن قانون ساز کونسل مقرر کرنے پرمسرت کا اظہار کیا۔

پروفیسر کودنڈارام جنہوں نے حالیہ تلنگانہ اسمبلی انتخابات میں اپنی پارٹی کے امیدوارنہ ٹہراتے ہوئے کانگریس کی حمایت کی تھی، نے ایک تلگو نیوزچینل سے بات کرتے ہوئے کہا کہ انہوں نے ایم ایل سی کے ذریعہ عوام کی خدمت کا راستہ تلاش کیا ہے۔

اس موقع کو فراہم کرنے پر انہوں نے گورنر اور وزیراعلی ریونت ریڈی سے خصوصی طورپر اظہارتشکر کیا۔انہوں نے کہاکہ اتحادی کی حیثیت سے تعاون کرتے ہوئے عوامی مسائل پر حکومت کو توجہ دلائی جائے گی۔

انہوں نے کہا کہ وہ پارلیمنٹ کے انتخابات میں بھی کانگریس کی حمایت کرناچاہتے ہیں۔دہلی میں تبدیلی ان کی خواہش رہی ہے۔اس تبدیلی کیلئے مساعی کی ضرورت ہے۔اسی لئے وہ کانگریس کی حمایت کرنا چاہتے ہیں۔ انہوں نے کہاکہ انہیں کونسل کا رکن ہونے کے ناطے کئی چیزیں سیکھنے کو ملیں گی۔

انہوں نے کہاکہ یہ موقع ان کیلئے فائدہ مند ثابت ہوسکے گا۔اس سوال پر کہ ان کو وزیرتعلیم بنایاجائے گا توکودنڈارا نے کہاکہ وہ اس بارے میں کوئی واقفیت نہیں رکھتے۔انہیں سرکاری طورپر کوئی اطلاع اس خصوص میں نہیں ملی ہے۔انہوں نے کہاکہ تلنگانہ کی ترقی کے سلسلہ میں ایوان میں اظہارخیال کریں گے۔