تلنگانہ اردو ورکنگ جرنلسٹس یونین کے اسٹیٹ کونسل اجلاس میں اہم فیصلے
اجلاس میں حکومتِ تلنگانہ سے مطالبہ کیا گیا کہ ایسے سینئر صحافی جن کی عمر 55 برس مکمل ہوچکی ہو، انہیں ماہانہ اعزازیہ فراہم کیا جائے۔ یونین کے صدر ڈاکٹر شجاع الدین افتخاری نے کہا کہ صحافی عمر بھر سماج کی رہنمائی اور عوامی مسائل کی ترجمانی میں اہم کردار ادا کرتے ہیں، اس لیے ان کی خدمات کے اعتراف میں اردو اکیڈمی کے ذریعہ اعزازیہ دیا جانا چاہیے۔
حیدرآباد: تلنگانہ اردو ورکنگ جرنلسٹس یونین کا اسٹیٹ کونسل اجلاس صدر دفتر واقع شاہ نگر، مصری گنج میں منعقد ہوا۔ اجلاس میں تنظیم کے استحکام، صحافیوں کی فلاح و بہبود اور پیشۂ صحافت کو درپیش مسائل پر تفصیلی غور و خوض کیا گیا۔ اجلاس میں ریاست کے مختلف اضلاع سے تعلق رکھنے والے ریاستی و ضلعی صدور، معتمدین، عہدیداران اور صحافی ارکان نے شرکت کی۔
اجلاس میں حکومتِ تلنگانہ سے مطالبہ کیا گیا کہ ایسے سینئر صحافی جن کی عمر 55 برس مکمل ہوچکی ہو، انہیں ماہانہ اعزازیہ فراہم کیا جائے۔ یونین کے صدر ڈاکٹر شجاع الدین افتخاری نے کہا کہ صحافی عمر بھر سماج کی رہنمائی اور عوامی مسائل کی ترجمانی میں اہم کردار ادا کرتے ہیں، اس لیے ان کی خدمات کے اعتراف میں اردو اکیڈمی کے ذریعہ اعزازیہ دیا جانا چاہیے۔
اس کے علاوہ مطالبہ کیا گیا کہ اکریڈیٹیشن کارڈ رکھنے والے صحافی کے انتقال پر حکومت کی جانب سے پانچ لاکھ روپے بطور ایکس گریشیا فراہم کیے جائیں۔ اجلاس میں یہ بھی فیصلہ کیا گیا کہ تنظیم سے وابستہ کسی صحافی کے انتقال کی صورت میں اس کے اہلِ خانہ کو مالی امداد فراہم کی جائے گی، جبکہ بیمار صحافیوں کی حتی المقدور مدد اور ہیلتھ انشورنس کے امکانات پر بھی غور کیا گیا۔
اجلاس میں رکنیت سازی مہم کا اعلان کرتے ہوئے بتایا گیا کہ 12 جنوری سے 20 جنوری 2026 تک حیدرآباد کے علاوہ ریاست کے تمام اضلاع میں رکنیت سازی مہم چلائی جائے گی۔
اجلاس میں اس بات پر اطمینان کا اظہار کیا گیا کہ تلنگانہ اردو ورکنگ جرنلسٹس یونین کی مسلسل نمائندگی کے نتیجہ میں حکومت نے اردو میڈیا کے نمائندے کو اکریڈیٹیشن کمیٹی میں شامل کرنے کا مطالبہ قبول کر لیا ہے۔ اس سلسلہ میں جاری کردہ جی او میں اردو میڈیا کی شمولیت کو یونین کی ایک بڑی اور تاریخی کامیابی قرار دیا گیا، جس سے تمام اردو صحافیوں کو فائدہ پہنچے گا خواہ وہ کسی بھی یونین یا اسوسی ایشن سے وابستہ ہوں۔
اجلاس میں یہ بھی فیصلہ کیا گیا کہ حکومت کی جانب سے حالیہ عرصہ میں جاری کئے گئے بعض سرکاری احکامات میں موجود نقائص کے تعلق سے یونین کی جانب سے باقاعدہ نمائندگی کی جائے گی۔
اجلاس کی صدارت یونین کے صدر ڈاکٹر شجاع الدین افتخاری نے کی۔ پروگرام کا آغاز مولانا محسن پاشاہ قادری نقشبندی (اسٹیٹ سکریٹری) کی تلاوتِ کلامِ پاک سے ہوا جبکہ اجلاس کی کارروائی مفتی محمد رئیس الدین قاسمی (سکریٹری جنرل) نے انجام دی۔
تنظیم کے سرپرستِ اعلیٰ ڈاکٹر ساجد معراج نے یونین کی کارکردگی پر تفصیلی روشنی ڈالی اور اس کے کارناموں کو بیان کیا۔ آخر میں صدرِ محترم نے اجلاس کے اختتام کا اعلان کیا۔
