عمران خان نے ضمانتیں منسوخ کرنے کے اقدام کوچیلنج کر دیا

لاہور:پاکستان تحریک انصاف ( پی ٹی آئی) کے چیئرمین اور پاکستان کے سابق وزیر اعظم عمران خاں نے دہشت گردی کے معاملے میں ضمانتیں منسوخ کرنے کا اقدام لاہور ہائیکورٹ میں چیلنج کردیا۔

چیئرمین پاکستان تحریک انصاف نے 7 مقدمات میں ضمانت منسوخی کا فیصلہ لاہور ہائیکورٹ میں چیلنج کیا۔ وکیل درخواست گزار کا عدالت میں کہنا تھا کہ درخواست گزار دہشت گردی عدالت میں مسلسل پیش ہوتے رہے ہیں، ٹرائل کورٹ نے درخواست گزار کو توشہ خانہ کیس میں سزا سنا دی۔

وکیل درخواست گزار نے کہا کہ پولیس نے درخواست گزار کو گرفتار کرکے اٹک جیل منتقل کردیا ہے، درخواست گزار جیل میں ہونے کے باعث انسداد دشت گردی عدالت میں پیش نہ ہوسکے۔

وکیل کا مزید کہنا تھا کہ ٹرائل کورٹ نے عدم پیروی پر ان کی لی گئی ضمانتوں کو مسترد کردیا ہے، اس فیصلے سے ان کا ناقابل تلافی نقصان ہوا۔ وکیل نے استدعا کی کہ عدالت ٹرائل کورٹ کے ضمانتوں کو مسترد کرنے کے 11 اگست کے فیصلے کو کالعدم قرار دے۔