ہندوستان نے کینڈین شہریوں کیلئے ای ویزا سرویس کا دوبارہ آغاز کردیا

نئی دہلی: ہندوستان نے کینیڈین شہریوں کے لیے ای ویزا سروس بحال کر دی ہے۔ ذرائع نے چہارشنبہ کو یہاں یہ اطلاع دی۔ کینیڈا میں ہندوستانی ہائی کمیشن میں سفارت کاروں کے سیکورٹی بحران کی وجہ سے ہندوستان کو 21 ستمبر سے کینیڈین شہریوں کو ویزا جاری کرنا بند کرنا پڑا تھا۔

ای ویزا سروس دوبارہ شروع ہونے کے بعد کینیڈا کے شہری ہندوستان کا سفر کر سکیں گے۔ ستمبر میں جی۔20 سربراہی اجلاس کے بعد کینیڈا کے وزیر اعظم جسٹن ٹروڈو نے اپنی پارلیمنٹ میں ہندوستانی حکومت پر خالصتانی دہشت گرد ہردیپ سنگھ نجر کے قتل میں ملوث ہونے کا الزام لگایا تھا، جس سے دونوں ممالک کے تعلقات میں نمایاں طور پر بگاڑ آیا۔

ساتھ ہی ہندوستانی سفارتکاروں کو دھمکیاں دینے اور ان پر حملے کی کوششیں کی گئیں۔ اس کے بعد سیکورٹی وجوہات کا حوالہ دیتے ہوئے ہندوستانی ہائی کمیشن نے عارضی طور پر ویزا سروس بند کرنے کا اعلان کیا تھا۔ واضح رہے کہ کینیڈین شہری نجر کو جون میں برٹش کولمبیا صوبے کے شہر سرے میں ایک گرودوارے کے باہر نامعلوم حملہ آوروں نے گولی مار کر ہلاک کر دیا تھا۔