جمعیت علماء گریٹر حیدرآباد کا اہم اجلاس: خدامِ صحابہ کوئز کے شرکاء کی تہنیت

حیدرآباد: بروز جمعہ، مسجد فردوس وجے نگر کالونی میں جمعیت علماء گریٹر حیدرآباد کی مجلس منتظمہ، عاملہ اور مدعویین خصوصی کا ایک اہم اجلاس منعقد ہوا۔

یہ اجلاس 30 ربیع الاول 1446 ہجری کو بعد نماز عشاء منعقد کیا گیا، جس کی صدارت استاذ الاساتذہ حضرت مولانا محمد مصدق قاسمی صاحب دامت برکاتہم العالیہ نے فرمائی۔

اجلاس کا آغاز قاری یونس علی خان صاحب دامت برکاتہم کی تلاوتِ کلامِ پاک سے ہوا، جبکہ مولانا انصار انور صاحب زیدمجدہ نے نعتِ رسول مقبول ﷺ پیش فرمائی۔

بعد ازاں عظمت صحابہ اور سیرتِ محسن انسانیت ﷺ مہم کا تفصیلی جائزہ لیا گیا، جس میں مولانا انصار انور، مولانا شاہ افتخار الدین قادری، مولانا عرفان، اور مولانا زبیر صاحبان نے اپنے حلقوں کی کارگزاری پیش کی۔

حضرت صدر محترم دامت برکاتہم نے مکاتب دینیہ کے قیام کی اہمیت پر روشنی ڈالی اور اس کے قیام کو ناگزیر قرار دیتے ہوئے حاضرین کی توجہ اس جانب مبذول کروائی۔ اس کے بعد عظمت صحابہ کوئز کے تجربات پر مبنی مشاورت کی گئی، جس میں مولانا انصار انور صاحب سمیت دیگر علما کرام نے اہم مشورے دیے۔

مفتی انعام الحق صاحب قاسمی نے خدامِ صحابہ کوئز کے شرکاء کو مبارکباد پیش کی، جبکہ حضرت صدر محترم دامت برکاتہم اور دیگر اکابرین نے تمام خدام کوئز کے شرکاء کو تہنیت پیش کرتے ہوئے انہیں تحائف سے نوازا۔ اس موقع پر حضرت مولانا سید نذیر احمد یونس صاحب قاسمی دامت برکاتہم نے شرکاء کا حوصلہ بڑھانے کے لیے مبارکبادی کلمات کہے اور اجلاس کے اخراجات کی تفصیلات پیش کیں۔

اجلاس کا اختتام حضرت صدر محترم دامت برکاتہم کی دعا پر ہوا، جبکہ میزبانی کے فرائض عبدالعزیز صاحب جنرل سکریٹری جمعیت علماء حلقہ نام پلی نے بحسن و خوبی انجام دیے۔