کے سی آر، ایک بار پھر چیف منسٹر بن جائیں گے: اسداویسی

حیدرآباد: آل انڈیا مجلس اتحاد المسلمین کے سربراہ اسدالدین اویسی نے پیر کے روز اس امید کااظہار کیا کہ تلنگانہ میں 30 نومبر کو منعقد شدنی انتخابات کے بعد چیف منسٹر کے چندرشیکھر راؤ ایک بار پھر ریاست میں برسر اقتدار آتے ہوئے اپنی کامیابی کی ہیٹ ٹرک بنائیں گے۔

الیکشن کمیشن کی جانب سے تلنگانہ کے بشمول 5 ریاستوں میں اسمبلی انتخابات کا شیڈول جاری کرنے کے بعد یہاں میڈیا سے نمائندوں سے بات چیت کرتے ہوئے اسدالدین اویسی نے کہاکہ پہلی بار ان کی پارٹی‘ راجستھان میں انتخابات لڑے گی۔

انہوں نے کہاکہ ہمیں قوی امید ہے کہ انشا اللہ کے سی آر ایک بار پھر تلنگانہ کے چیف منسٹر بن جائیں گے اور ہماری پارٹی کے ایم ایل ایز بھی جو جس کسی حلقہ سے بھی انتخاب لڑیں گے‘ کامیابی حاصل کریں گے۔

حلقہ لوک سبھا حیدرآباد کے رکن نے کہاکہ مجلس نے راجستھان میں پارٹی کے لیے 3 امیدواروں کے ناموں کااعلان کیاہے اور تلنگانہ میں پارٹی امیدواروں کے ناموں کااعلان عنقریب کیاجائے گا۔

انہوں نے کہاکہ ایم آئی ایم ان انتخابات کے لیے پوری طرح تیار ہے اور اس یقین کااظہار کیا کہ عوام بالخصوص تلنگانہ میں مجلس کو اس کے کام کی اس کی رسائی اور دستیابی پر ضرور ووٹ دیں گے۔

مجلس پر بی آر ایس کی بی ٹیم کی طرح کام کرنے کے الزامات کو مسترد کرتے ہوئے اسدالدین اویسی نے کہاکہ ایم آئی ایم نے 2004 سے 2014 کے دوران سابق وزیراعظم ڈاکٹر منموہن سنگھ کی حکومت کی تائید کی تھی۔