ایل آر ایس پر عمل کو30 اپریل تک مکمل کرنے کی ہدایت

حیدرآباد: تلنگانہ حکومت نے تمام کلکٹرس اور میونسپل کمشنروں کو ہدایت دی ہے کہ 30 اپریل تک لے آؤٹ ریگولرائزیشن اسکیم (ایل آر ایس) کے عمل کی 100 فیصد تکمیل کو یقینی بنایا جائے۔

سکریٹری محکمہ بلدی نظم و نسق ایم دانا کشور نے ایک ویڈیو کانفرنس کے دوران زیر التواء درخواستوں کو فوری نمٹانے پر زور دیا۔ ڈی ٹی سی پی ڈائریکٹر دیویندر ریڈی کے ہمراہ دانا کشور نے کلکٹرس، مقامی اداروں کے ایڈیشنل کلکٹرس، میونسپل کمشنرس اور ٹاؤن پلاننگ عہدیداروں کے ساتھ ایل آر ایس کی پیش رفت کا تفصیلی جائزہ لیا۔

انہوں نے ان اضلاع کے افسران سے بات کی جہاں کارروائیوں کی رفتار سست ہے، اور انہوں نے کلکٹرس سے بھی مشاورت کی جنہوں نے بہتر کارکردگی کا مظاہرہ کرتے ہوئے اچھے نتائج دیے، تاکہ ان کی حکمت عملی سمجھی جا سکے۔ انہوں نے اُن درخواست گزاروں کی کارروائی تیز کرنے کی ہدایت دی جنہوں نے پہلے ہی ایل آر ایس فیس ادا کر دی ہے۔

انہوں نے کہا اگرچہ اوپن پلاٹس کی تصدیق میں تسلی بخش پیش رفت ہوئی ہے، لیکن لے آؤٹس کی جانچ میں تاخیر پر تشویش ظاہر کی۔ انہوں نے افسران کو ہدایت دی کہ وہ لے آؤٹ اور اوپن پلاٹس دونوں کی توثیق کو ترجیح دیں، اور بلک درخواستوں کی منصفانہ اور تیز تر کارروائی کو یقینی بنائیں۔

دانا کشور نے ایل آر ایس کے فوائد کو عوام تک پہنچانے کیلئے پرنٹ، الیکٹرانک، سوشل میڈیا اور فلیکس بورڈز کے ذریعہ تشہیر پر زور دیا، اور ایسے درخواست گزاروں سے فالو اپ کی ہدایت دی جنہوں نے اب تک فیس ادا نہیں کی، تاکہ وہ 30 اپریل سے قبل ادائیگی مکمل کر لیں۔