ممبئی: ریاستی اپوزیشن مہا وکاس اگھاڑی (ایم وی اے) کے رہنماؤں نے پارلیمنٹ کے آئندہ خصوصی اجلاس میں حکمراں بھارتیہ جنتا پارٹی (بی جے پی) کی جانب سے ‘ایک ملک، ایک انتخاب’ کے ایجنڈے کو آگے بڑھانے کے لئے کیے گئے مبینہ اقدام کی یہاں جمعہ کو مذمت کی ہے۔
کانگریس کے قائد حزب اختلاف (اسمبلی) وجئے ودیٹیوار نے اس اقدام پر حملہ کرتے ہوئے کہا کہ بی جے پی حکومت خوفزدہ ہوکر اس طرح کے کام کررہی ہے اور انڈیا اتحاد کے قائدین اس مسئلہ پر بات کریں گے۔
شیو سینا (یو بی ٹی) کی رکن پارلیمنٹ پرینکا چترویدی نے کہا کہ ’ون نیشن، ون الیکشن‘ کے لئے پہلے ہی 3 کمیٹیاں تشکیل دی جاچکی ہیں اور انہوں نے اپنی رپورٹ بھی پیش کردی ہے۔ چوتھی کمیٹی بنانے کی ضرورت کیوں پیش آئی؟
’’لہذا یہ چوتھی کمیٹی ہندوستان اور عوام کے ایجنڈے سے توجہ ہٹانے کے لئے ایک ریڈ ہیرنگ کے سوا کچھ نہیں ہے۔ قیمتوں میں ریکارڈ اضافہ، بے روزگاری، خواتین کے خلاف بڑھتے ہوئے مظالم، اڈانی گروپ کے مالیاتی فراڈ اور کسانوں کے بارے میں مرکز کب ایک کمیٹی بنائے گا؟ دوسری طرف چین اپنے علاقائی نقشوں میں اروناچل پردیش، اکسائی چن کو شامل کر رہا ہے؟ جب تک بنیادی مسائل حل نہیں ہوتے، یہ ایک خلفشار کے سوا کچھ نہیں ہے۔‘‘
نیشنلسٹ کانگریس پارٹی (این سی پی) کے قومی ترجمان کلائیڈ کرسٹو نے حیرت کا اظہار کیا کہ جمہوریت میں ‘ایک قوم، ایک انتخاب’ کی کسی بھی تجویز کو کیسے آگے بڑھایا جا سکتا ہے، بنیادی ڈھانچہ اپنی جگہ پر نہیں ہے، اپوزیشن جماعتوں سے مشاورت نہیں کی جاتی ہے اور عوام کے مسائل کے پیش نظر ملک اس کے لئے تیار نہیں ہے۔
کرسٹو نے دریافت کیا کہ ’’بی جے پی کا مقصد کیا ہے…؟ کیا وہ انڈیا اتحاد کے بڑھتے ہوئے اثر و رسوخ سے اس قدر خوفزدہ ہے اور اسے شروع ہونے سے پہلے ہی گرانا چاہتی ہے؟ کیوں بی جے پی اچانک مایوس ہو کر ملک کو اعتماد میں لئے بغیر ملک کو خطرناک حالات میں دھکیلنے کی کوشش کر رہی ہے؟
کانگریس کے سابق وزیر اعلیٰ پرتھوی راج چوان نے کہا کہ ’’اس کا مطلب یہ ہے کہ بی جے پی انڈیا اتحاد سے پریشان ہے‘‘ اور وہ اس طرح کے ہتھکنڈوں کا سہارا لے رہی ہے، لیکن وہ کامیاب نہیں ہوں گے۔
شیو سینا (یو بی ٹی) کے ایم پی اور چیف ترجمان سنجے راوت نے کہا کہ اپوزیشن جماعتیں انڈیا کانکلیو میں ایسی کسی بھی حرکت کی سختی سے مخالفت کریں گی جہاں بہت سے اہم فیصلے لیے جانے کا امکان ہے۔
چترویدی نے سوال کیا کہ حکومت پچھلی کمیٹیوں کی رپورٹوں کو قبول کئے بغیر، الیکشن کمیشن آف انڈیا، تمام پارٹیوں، ریاستی وزیر اعلیٰ اور دیگر کی رضامندی لئے بغیر یہ کیسے کرسکتی ہے؟ انہوں نے اس عزم کا اظہار کیا کہ پوری اپوزیشن اس کی مخالفت کرے گی۔
