تلنگانہ اور اے پی میں مہاشیوراتری کا جوش وخروش

حیدرآباد: دونوں تلگوریاستوں تلنگانہ اور آندھرا پردیش میں آج مہاشیوراتری کا تہوار روایتی عقیدت اور مذہبی جوش و خروش کے ساتھ منایا جا رہا ہے۔

حیدرآباد اور امراوتی کے بشمولتمام چھوٹے بڑے شہروں کے شیو مندروں میں صبح سے ہی شردھالووں کی لمبی قطاریں دیکھی جا رہی ہیں جہاں لوگ خصوصی پوجا کر رہے ہیں۔

تلنگانہ میں تاریخی مندروں کو روشنیوں اور پھولوں سے خوبصورتی سے سجایا گیا ہے۔ راجنا سرسلہ ضلع کے مشہور سری راج راجیشور سوامی مندر ویمولواڑا میں شردھالووں کا سمندر امڈ آیا ہے جبکہ کالیشورم میں عوام نے دریائے گوداوری میں مقدس اشنان کیا۔

حیدرآباد کے ملک پیٹ اور نامپلی کے قدیم شیو مندروں میں بھی رات بھر جاگرن کا اہتمام کیا گیا۔ دوسری جانب آندھرا پردیش کے ساحلی علاقوں میں بھی شیو راتری کی خصوصی تقاریب کا اہتمام کیاگیا۔

دونوں ریاستوں کی حکومتوں نے منادرآنے والوں کی سہولت کے لئے بہتر انتظامات کئے ہیں جن میں ٹی جی ایس آر ٹی سی اور اے پی ایس آر ٹی سی کی ہزاروں خصوصی بسیں، سی سی ٹی وی کیمروں کے ذریعہ سیکیورٹی کی نگرانی، میڈیکل کیمپ اور پینے کے صاف پانی کی فراہمی شامل ہے۔