مساجد کو تربیت اور تعمیرِ امّت کا مرکز بنایا جائے، مولانا محمود خاں عمری کا زور

حیدرآباد: جماعت اسلامی ہند، ملک پیٹ کے زیراہتمام مساجد کمیٹیوں کے ذمہ داران اور خطیب حضرات کا ایک اہم مشاورتی اجلاس 23 نومبر کو مسلم میٹرنٹی ہاسپٹل اعظم پورہ کے آڈیٹوریم ہال میں منعقد ہوا۔ اجلاس کی صدارت شیخ التفسیر مولانا محمود خاں عمری، سرپرست جامعہ ریاض الصالحات حیدرآباد نے کی۔

اجلاس میں ملک پیٹ کی مساجد کے صدور و سکریٹریز اور خطیب حضرات نے شرکت کی اور ملّت کو درپیش مسائل اور مسلم سوسائٹی کی موجودہ صورتحال پر اظہارِ خیال کیا۔ شرکاء نے اس بات پر اتفاق کیا کہ مساجد کے ذریعہ محلّہ اور بستی کی سطح پر اصلاحِ معاشرہ اور تعمیرِ امّت کے لیے منظم جدوجہد ضروری ہے۔

مولانا محمود خاں عمری نے اپنے صدارتی خطاب میں کہا کہ مساجد صرف عبادت گاہیں نہیں بلکہ تربیت، تعلیم و تدریس، کمیونٹی کی رہنمائی اور معاشرتی اصلاح کے اہم مراکز بھی ہیں۔ انہوں نے زور دیا کہ امّت کو صحیح معنوں میں خیرِ امّت کا کردار ادا کرنے کے لیے مسجد و محلّہ کی سطح پر منظم اور متواتر کوششیں کی جائیں۔ اس سلسلے میں انہوں نے سیرتِ نبویؐ کی مثال دی کہ حضور ﷺ نے کس طرح مسجدِ نبویؐ سے ہمہ جہت سرگرمیاں انجام دیں۔

اس موقع پر محمد مجیب الاعلیٰ، امیرِ مقامی ملک پیٹ، نے جماعت اسلامی ہند کی جانب سے منائی جانے والی دس روزہ مہم ’’حقوقِ ہم سایہ‘‘ کا تعارف پیش کیا اور شرکاء سے گزارش کی کہ وہ پڑوسیوں کے درمیان تعلقات بہتر بنانے کی ضرورت پر توجہ دیں۔ انہوں نے کہا کہ آج پڑوسیوں کے درمیان تلخیاں اور فاصلے پیدا ہو گئے ہیں، جبکہ دینی تعلیمات ہمیں ایک دوسرے کے قریب آنے اور حقوق کی ادائیگی پر زور دیتی ہیں۔

ڈاکٹر شیخ محمد عثمان، ذمہ دار اے پی سی آر تلنگانہ، نے وقف جائیدادوں کے تحفظ کی اہمیت پر زور دیا اور امید پورٹل پر جائیدادوں کی رجسٹریشن کے سلسلے میں شرکاء کے سوالات کے جوابات دیے۔

اجلاس میں مساجد کمیٹیوں کے ذمہ داران نے سوسائٹی میں مساجد کے کردار اور اصلاحِ معاشرہ کے حوالے سے مفید مشورے دیے۔ سید عبدالقادر ناصر، نائب صدر انتظامی کمیٹی مسجدِ اجالے شاہ، نے پڑوسیوں کے درمیان بہتر تعلقات کی اہمیت اجاگر کی۔ ناظمِ اجلاس مولانا مفتی طیب عبدالسلام قاسمی نے مسجد اور محلّہ کی سطح پر اصلاحِ معاشرہ کے کام کا خاکہ پیش کیا۔ افتتاحی کلمات ضیاء الرحمن صدیقی سلیم، معاون امیرِ مقامی ملک پیٹ، نے پیش کیے۔ اس موقع پر سکریٹریز سید جنید الرحمان قادری، ڈاکٹر رضا احمد خاں، کنوینر مہم ’’حقوقِ ہم سایہ‘‘ حافظ جنید حفیظ، اور محمد عبدالودود، سکریٹری الخیر سوسائٹی ملک پیٹ بھی موجود تھے۔