میڈچل مارکیٹ میں گیس سلنڈر دھماکہ

حیدرآباد: میڈچل مارکیٹ میں پیر کے روز ایک دکان میں گیس سلنڈر پھٹنے کا واقعہ پیش آیا، جس کے بعد علاقے میں آگ بھڑک اٹھی اور مقامی افراد میں خوف و ہراس پھیل گیا۔

تفصیلات کے مطابق، میڈچل مارکیٹ میں میونسپلٹی کے ایک شٹر میں مبینہ طور پر غیر قانونی طور پر گیس ری فلنگ کا مرکز چلایا جا رہا تھا۔ بتایا جاتا ہے کہ دکان میں ایک بڑے گیس سلنڈر سے چھوٹے سلنڈر میں گیس منتقل کی جا رہی تھی کہ اسی دوران اچانک سلنڈر زور دار دھماکے کے ساتھ پھٹ گیا۔

دھماکہ اتنا شدید تھا کہ دکان میں آگ بھڑک اٹھی اور دیکھتے ہی دیکھتے شعلے بلند ہونے لگے۔ اچانک پیش آئے اس واقعے سے مارکیٹ میں موجود دکانداروں اور مقامی افراد میں خوف و ہراس پھیل گیا اور کچھ دیر کے لیے افراتفری کا ماحول پیدا ہوگیا۔

واقعے کی اطلاع ملتے ہی میڈچل پولیس اور فائر بریگیڈ کا عملہ فوری طور پر جائے حادثہ پر پہنچ گیا۔ فائر فائٹنگ عملے نے فوری کارروائی کرتے ہوئے آگ پر قابو پالیا اور صورتحال کو مزید سنگین ہونے سے روک دیا۔

پولیس اور فائر بریگیڈ کے عملے کی بروقت کارروائی کے نتیجے میں اس واقعے میں کوئی جانی نقصان نہیں ہوا، جس پر مقامی افراد نے راحت کی سانس لی۔

تاہم، میونسپلٹی کے شٹر میں مبینہ طور پر غیر قانونی گیس ری فلنگ مرکز چلائے جانے کے معاملے نے حفاظتی انتظامات پر سوالات کھڑے کر دیے ہیں۔ اب دیکھنا یہ ہے کہ متعلقہ حکام اس واقعے کا نوٹس لیتے ہوئے غیر قانونی گیس ری فلنگ کے خلاف کیا کارروائی کرتے ہیں۔