محمد سراج ہندوستانی ٹیم میں شامل، ہرشیت رانا باہر

ممبئی  : ہندوستانی تیز گیند باز ہرشیت رانا مردوں کے ٹی 20 ورلڈ کپ 2026 سے باہر ہو گئے ہیں اور ان کی جگہ محمد سراج کو ہندوستانی ٹیم میں شامل کیا گیا ہے۔

ہرشیت رانا کو جنوبی افریقہ کے خلاف 4 فروری کو نوی ممبئی میں کھیلے گئے پریکٹس میچ کے دوران گھٹنے میں چوٹ لگی تھی۔ ماہرین سے مشورہ اور اسکین کے بعد بی سی سی آئی کی میڈیکل ٹیم نے انہیں ٹورنامنٹ میں شرکت کے لیے ان فٹ قرار دے دیا۔

ہرشیت رانا نے حال ہی میں نیوزی لینڈ کے خلاف پانچ ٹی 20 میچوں کی ہوم سیریز میں تین میچ کھیلے تھے جسے ہندوستان نے 4-1 سے جیت لیا تھا۔ رانا کو ورلڈ کپ اسکواڈ میں ایک آل راؤنڈر کے طور پر شامل کیا گیا تھا اور نیوزی لینڈ کے خلاف تیسرے ون ڈے میں انہوں نے نصف سنچری بھی بنائی تھی۔ رانا کے ورلڈ کپ سے باہر ہونے کے بعد ہندوستانی ٹیم میں تیز گیند بازی آل راؤنڈر کے طور پر ہاردک پانڈیا اور شیوم دوبے شامل ہیں۔

محمد سراج نے اب تک اپنے ٹی 20 کیریئر میں کل 16 میچ کھیلے ہیں اور 7.79 کی اکانومی اور 32.28 کی اوسط سے 14 وکٹ حاصل کیے ہیں۔ تاہم سراج نے جولائی 2024 کے بعد سے کوئی بھی ٹی 20 میچ نہیں کھیلا ہے۔ انہوں نے آخری ٹی 20 میچ 30 جولائی 2024 کو پلے کیلے میں سری لنکا کے خلاف کھیلا تھا۔

ہندوستان ورلڈ کپ میں اپنے سفر کا آغاز 7 فروری کو امریکہ کے خلاف کرے گا۔

ہندوستانی اسکواڈ میں سوریہ کمار یادو (کپتان)، ابھیشیک شرما، سنجو سیمسن (وکٹ کیپر)، ایشان کشن (وکٹ کیپر)، تلک ورما، ہاردک پانڈیا، شیوم دوبے، اکشر پٹیل (نائب کپتان)، رنکو سنگھ، جسپریت بمراہ، ارشدیپ سنگھ، کلدیپ یادو، ورون چکرورتی، واشنگٹن سندر اور محمد سراج شامل ہیں۔