ووٹ کے لئے رقم کی چوری۔ نوجوان خودکشی کے لئے سیل ٹاور پر چڑھ گیا
اس واقعہ پر اشوک اس قدر دلبرداشتہ ہوا کہ وہ فوری طور پر قریب ہی واقع ایک سیل ٹاور پر چڑھ گیا اور وہاں سے چھلانگ لگا کر خودکشی کرنے کی دھمکی دینے لگا۔ اس ہنگامہ کو دیکھ کر مقامی افرادمیں خوف و ہراس پھیل گیا۔
حیدرآباد: تلنگانہ کے سنگاریڈی کے جوگی پیٹ میں ایک عجیب و غریب واقعہ پیش آیا جہاں بلدی انتخابات کی مہم کے دوران ایک کونسلر امیدوار کی جانب سے ملی رقم کے چوری ہونے پر ایک نوجوان نے خودکشی کی کوشش کی۔
تفصیلات کے مطابق جوگی پیٹ کے مکل اشوک نامی نوجوان کو انتخابی مہم کے دوران ایک امیدوار نے 4000روپئے دیے تھے۔ اشوک نے اس رقم سے نیا موبائل فون خریدنے کا خواب دیکھا تھا لیکن جب وہ بیدار ہوا تو جیب سے رقم غائب تھی۔ اشوک کو شبہ ہوا کہ کسی نے اس کے گھر سے رقم کی چوری کرلی۔
اس واقعہ پر اشوک اس قدر دلبرداشتہ ہوا کہ وہ فوری طور پر قریب ہی واقع ایک سیل ٹاور پر چڑھ گیا اور وہاں سے چھلانگ لگا کر خودکشی کرنے کی دھمکی دینے لگا۔ اس ہنگامہ کو دیکھ کر مقامی افرادمیں خوف و ہراس پھیل گیا۔
اطلاع ملتے ہی اشوک کی اہلیہ پوچماں اور خاندان کے دیگر افراد وہاں پہنچے جو اسے نیچے اترنے کے لئے منت سماجت کرنے لگے۔ جب گھر والوں نے اسے یقین دلایا کہ رقم اسے دے دی جائے گی تب اشوک ٹاور سے نیچے اترا۔
