پارلیمنٹ مانسون اجلاس کا پیر سے آغاز، منگل کو عام بجٹ

نئی دہلی: مرکزی وزیر فینانس نرملا سیتارمن منگل کے دن مرکزی بجٹ پیش کریں گی۔ آئندہ ہفتہ پارلیمنٹ کا مانسون اجلاس شروع ہونے والا ہے۔

متحدہ اپوزیشن نیٹ پیپر لیک کیس تا ریلوے سیفٹی مختلف مسائل پر این ڈی اے حکومت کو گھیرنے کے لئے تیار ہیں۔ پیر کے دن شروع ہونے والے مانسون اجلاس کی 12 اگست تک 19 بیٹھکیں ہوں گی۔ توقع ہے کہ حکومت 6 بلز پیش کرے گی۔

سابق چیف منسٹر اوڈیشہ نوین پٹنائک کی بی جے ڈی نے اعلان کیا ہے کہ وہ مضبوط اپوزیشن کا رول ادا کرے گی۔ وہ ریاست کے مفاد میں جارحانہ طور پر مسائل اٹھائے گی۔

انہوں نے اپنی پارٹی کے ارکان پارلیمنٹ سے کہا ہے کہ وہ اوڈیشہ کو خصوصی درجہ دینے کا مطالبہ کریں۔

قبل ازیں کانگریس قائد جئے رام رمیش نے کہا تھا کہ سرکاری بینکوں میں حصے داری 51فیصد سے گھٹانے حکومت کی کسی بھی کوشش کی مزاحمت کی جائے گی۔

آئی اے این ایس کے بموجب مرکزی وزیر فینانس نرملا سیتارمن مرکزی بجٹ سے ایک دن قبل 22جولائی کو پارلیمنٹ میں معاشی سروے (اکنامک سروے) پیش کریں گی، جو معیشت کا، رپورٹ کارڈ ہوگا۔ یہ چیف اکنامک اڈوائزر وی اننت ناگیشورن کی ٹیم کا تیار کردہ ہوگا۔