مرلی وجئے انٹرنیشنل کرکٹ سے سبکدوش

چینائی: ہندوستان کے سابق اوپنر بلے باز مرلی وجے نے انٹرنیشنل کرکٹ سے ریٹائرمنٹ کا اعلان کردیا۔ انہوں نے پیر کو ٹوئٹر پر بتایاکہ اب وہ غیرملکی لیگز میں قسمت آزمائیں گے۔

وجئے نے آخری بار ہندوستان کیلئے دسمبر 2018 میں آسٹریلیا کے خلاف پرتھ میں ایک بین الاقوامی میچ کھیلا تھا۔ انہوں نے 61 ٹسٹ، 17 ونڈے اور 9 ٹی ٹوئنٹی میاچس میں ہندوستان کی نمائندگی کی۔

وجے نے 61 ٹسٹ میں 3982 رنز، 17 ونڈے میں 339 رنز اور 9 ٹی ٹوئنٹی میچوں میں 169 رنز بنائے۔ انہوں نے ٹسٹ میں 12 سنچریاں بنائی تھیں۔ مرلی کرکٹ کے سب سے بڑے فارمیٹ میں کامیاب رہے۔

انہوں نے 38.28 کی اوسط سے اسکور کیا۔ وجے کا سب سے زیادہ اسکور 167 رنز تھا۔ انہوں نے ٹسٹ میں 15 نصف سنچریاں بھی بنائیں۔ وہ ونڈے اور ٹی ٹوئنٹی میں ٹسٹ جیسی کامیابی حاصل نہیں کرسکے۔ مرلی وجے نے کہاکہ آج بیحد شکرگزار اور عاجزی کے ساتھ میں تمام طرز کی بین الاقوامی کرکٹ سے ریٹائرمنٹ کا اعلان کرتا ہوں۔

میرا 2002-2018 کا سفر میری زندگی کے سب سے شاندار برسوں میں سے ایک رہاہے کیونکہ یہ کھیل کے اعلیٰ ترین سطح پر ہندوستان کی نمائندگی کرنے کا اعزاز تھا۔ میں بی سی سی آئی، ٹاملناڈو کرکٹ اسوسی ایشن (ٹی این سی اے) اور چینائی سوپر کنگز کی طرف سے مجھے دیے گئے مواقع کیلئے شکر گزار ہوں۔