بندر کے چھینے ہوئے بیگ کو واپس لینے کی کوشش میں 150 فٹ گہری کھائی میں گر کر استاد کی موت
مہاراشٹر کے ناگپور سے تعلق رکھنے والے 52 سالہ ایک استاد کی مدھیہ پردیش کے مشہور پہاڑی مقام پچمڑھی میں کھائی میں گرنے سے موت ہوگئی۔ یہ حادثہ اس وقت پیش آیا جب وہ ایک بندر کے چھینے ہوئے بیگ کو واپس لینے کی کوشش کررہے تھے۔
ناگپور : مہاراشٹر کے ناگپور سے تعلق رکھنے والے 52 سالہ ایک استاد کی مدھیہ پردیش کے مشہور پہاڑی مقام پچمڑھی میں کھائی میں گرنے سے موت ہوگئی۔ یہ حادثہ اس وقت پیش آیا جب وہ ایک بندر کے چھینے ہوئے بیگ کو واپس لینے کی کوشش کررہے تھے۔
بتایا گیا ہے کہ وہ تقریباً 150 فٹ گہری کھائی میں جاگرے۔متوفی کی شناخت وجے نائک کے طور پر کی گئی ہے، جو ناگپور کے رامداس پیٹھ علاقے میں واقع سومل وار اسکول میں این سی سی کے استاد تھے۔
وہ 20 طلبہ، اپنے ساتھی اساتذہ اور والد کے ہمراہ سیر و تفریح کے لیے پچمڑھی گئے ہوئے تھے۔اطلاعات کے مطابق، یہ واقعہ جمعہ کی صبح تقریباً 6 بج کر 45 منٹ پر پیش آیا۔ اس وقت یہ گروپ سن رائز ویو پوائنٹ پر موجود تھا کہ اچانک ایک بندر نے اسکول کی ایک طالبہ کا بیگ چھین لیا۔بتایا جاتا ہے کہ وجے نائک بندر کے پیچھے گئے اور بیگ واپس حاصل کرنے کے لیے حفاظتی ریلنگ عبور کرگئے۔
اسی دوران ان کا توازن بگڑ گیا اور وہ گہری کھائی میں جاگرے۔واقعے کی اطلاع ملتے ہی پولیس اور مقامی باشندوں نے بچاؤ کارروائی شروع کردی۔ تاہم، دشوار گزار پہاڑی راستے اور مشکل جغرافیائی حالات کے باعث امدادی ٹیم کو جائے حادثہ تک پہنچنے کے لیے تقریباً تین کلومیٹر کا پیدل سفر کرنا پڑا۔
تقریباً ساڑھے تین گھنٹے کی مسلسل کوششوں کے بعد صبح 9 بج کر 30 منٹ کے قریب وجے نائک کی لاش کو اسٹریچر کی مدد سے کھائی سے باہر نکالا گیا۔بعد ازاں لاش کو پوسٹ مارٹم کے لیے سرکاری اسپتال منتقل کیا گیا۔ ضروری کارروائی مکمل ہونے کے بعد لاش اہل خانہ کے حوالے کردی گئی، جو اسے لے کر ناگپور روانہ ہوگئے۔اس المناک حادثے سے اسکول کے طلبہ اور تفریحی دورے میں شامل دیگر افراد شدید صدمے میں ہیں۔
