نارائن پیٹ کوڑنگل لفٹ ایریگیشن پراجیکٹ کو منظوری، چیف منسٹر ریونت ریڈی سے عوام کا اظہارِ تشکر

حیدرآباد: نارائن پیٹ کوڑنگل لفٹ ایریگیشن پراجیکٹ کو بالآخر وزیراعلیٰ اے. ریونت ریڈی کی بدولت منظوری مل گئی، جس سے مقامی عوام اور کسانوں کی دو دہائیوں پرانی جدوجہد کامیابی سے ہمکنار ہوئی۔ اس موقع پر ریاستی وزیر برائے کھیل، مویشی پالن و ڈیری پروڈکٹس واکیٹی سری ہری نے نارائن پیٹ کے سی وی آر بھون میں منعقدہ پریس کانفرنس سے خطاب کرتے ہوئے کہا کہ آنے والی نسلیں وزیراعلیٰ کے اس احسان کو کبھی فراموش نہیں کریں گی۔

انہوں نے کہا کہ وزیراعلیٰ نے جی او 69 کو جی او 14 میں تبدیل کرتے ہوئے 4530 کروڑ روپئے کے فنڈز جاری کیے۔ نہ صرف پراجیکٹ کو منظوری ملی بلکہ کسانوں کے معاوضے کو بھی 14 لاکھ فی ایکڑ سے بڑھا کر 20 لاکھ کردیا گیا، جس سے متاثرہ کسانوں کی دیرینہ خواہش پوری ہوئی۔

وزیر نے سابقہ حکومت کو تنقید کا نشانہ بناتے ہوئے کہا کہ بی آر ایس دورِ حکومت میں پالمور رنگاریڈی لفٹ ایریگیشن پراجیکٹ کے نام پر عوام کو دھوکہ دیا گیا۔ اس کے برخلاف وزیراعلیٰ ریونت ریڈی نے کسانوں کے مفاد میں عملی اقدامات کرتے ہوئے علاقہ کو قحط سے نجات دلانے کا فیصلہ کیا۔

سابق ضلع کانگریس صدر شیوا کمار ریڈی نے کہا کہ 2014 میں متحدہ آندھرا پردیش کا آخری جی او، جی او 69، دراصل نارائن پیٹ کوڈنگل لفٹ ایریگیشن پراجیکٹ کے لیے ہی منظور کیا گیا تھا۔ مگر اس کے باوجود کسی حکومت نے قحط کے مسئلے کو سنجیدگی سے حل نہیں کیا۔

کسان سنگم قائدین وینکٹ رام ریڈی، مچندر اور وینکو نے بھی اجلاس سے خطاب کرتے ہوئے وزیراعلیٰ سے اظہار تشکر کیا اور کہا کہ ان کے فیصلے سے کسانوں کے مسائل بڑی حد تک حل ہوگئے ہیں۔

وزیر واکیٹی سری ہری نے آخر میں کسانوں سے اپیل کی کہ وہ گزشتہ 62 دنوں سے جاری ہڑتال ختم کریں اور زمین کے حصول کے کام میں حکومت سے تعاون کریں تاکہ پراجیکٹ پر جلد از جلد عمل آوری ممکن ہوسکے۔