نصر اللہ کی محبت میں گرفتار انجو کی پاکستان سے وطن واپسی

الور: راجستھان کے بھیواڑی سے گزشتہ جون میں اپنے فیس بک پریمی سے پاکستان ملنے گئی انجو آج اپنے ملک واپس لوٹ گئی لیکن ابھی تک بھیواڑی نہیں پہنچی۔موصولہ اطلاع کے مطابق انجو دیر رات واگھا بارڈر پہنچی اور وہاں پولیس اس سے پوچھ گچھ کر رہی ہے۔

بتایا جا رہا ہے کہ پاکستان میں شادی کے بعد انجو کی دماغی حالت ٹھیک نہیں ہے اور وہ اپنے بچوں کو یاد کر رہی تھی، اس لیے وہ عارضی طور پر ہندوستان آئی ہے۔ جون 2023 میں پاکستانی فیس بک پریمی نصراللہ سے محبت کرنے کے بعد وہ اپنے دو بچوں اور شوہر اروند کو بتائے بغیر گھر چھوڑ کر اپنے عاشق سے ملنے پاکستان چلی گئی اور وہاں اس نے اپنے فیس بک پریمی نصر اللہ سے شادی کر لی۔

بھیواڑی کی رہائشی انجو کی ایک 15سالہ بیٹی اور 4 سالہ بیٹا ہے، جنہیں وہ اپنے پیچھے چھوڑ کر پاکستان چلی گئی تھی۔ ابتدائی طور پر بتایا گیا کہ وہ تین چار دن میں واپس آجائے گی لیکن اس نے وہاں اپنے عاشق نصر اللہ سے شادی کر لی اور اسلام قبول کر کے اپنا نام فاطمہ رکھ لیا۔

وہ اپنے شوہر نصراللہ کے ساتھ وہاں رہنے لگی۔ادھر انجو کے ہندوستانی شوہر اروند نے انجو کے خلاف بھیواڑی تھانے میں کئی مقدمات درج کرائے ہیں جن میں دھوکہ دہی سے دوسری شادی اور قتل بھی شامل ہے۔ بتایا جا رہا تھا کہ انجو نے پاکستانی شوہر نصر اللہ سے کئی بار ہندوستان جانے کی بات کی لیکن ویزے کے مسئلے کی وجہ سے وہ ہندوستان واپس نہیں آسکی، پہلے بتایا گیا تھا کہ وہ اکتوبر میں واپس آ جائے گی لیکن ویزے کی وجہ سے نہیں آئی۔

اب وہ نومبر کے آخر میں ہندوستان پہنچی ہے اور کل رات واگھا بارڈر پہنچی ہے۔ ہندوستان پہنچنے کے بعد اسے پولیس کا سامنا کرنا پڑے گا۔ انہیں اپنے ہندوستانی شوہر اروند کی طرف سے دائر رپورٹ کی بنیاد پر قانونی کارروائی کا بھی سامنا کرنا پڑے گا۔

یہ بھی انکشاف ہوا کہ انجو اور اروند کی 10سال سے کشیدہ ازدواجی زندگی چل رہی تھی، اس لیے اس کی اپنے پاکستانی عاشق نصر اللہ سے دوستی ہو گئی تھی اور یہ دوستی ایک کمپنی کی مارکیٹنگ کے ذریعے قائم ہوئی۔

انجو بھیواڑی میں ایک کمپنی میں کام کرتی تھی اور اپنے پاکستانی عاشق نصراللہ کے اصرار پر پاکستان چلی گئی اور وہیں شادی کر لی۔اس حوالے سے جب انجو کے ہندوستانی شوہر اروند سے رابطہ کرنے کی کوشش کی گئی تو ان کا موبائل بھی بند تھا اور گھر پر کوئی نہیں تھا۔ تالا لٹکا ہوا ہے۔ اروند اور اس کے بچوں کا کوئی اتاپتا نہیں ہے۔