قومی ایوارڈ یافتہ افسانوی گلوکارہ وانی جئے رام چل بسیں

حیدرآباد: قومی ایوارڈ یافتہ افسانوی گلوکار ہ وانی جئے رام چل بسیں۔ سرکردہ گلوکارہ کی موت چینائی کے ننگم باکم میں واقع ان کے مکان میں ہوگئی۔ وہ 78 برس کی تھیں۔ وانی نے ہندی فلم گڈی کے گیت ”بول رے پاپی ہرا“کے ساتھ گلوکاری کا آغاز کیا۔

 حال ہی میں گلوکارہ نے پیشہ ور گلوکارہ کے طور پر 50 سال کے سفر کا جشن منایا۔ تقریباً پانچ دہوں پر مشتمل شاندار اور کامیاب کیرئیر کے دوران انہوں نے بیشتر ہندوستانی زبانوں بشمول تمل، کنڑ، ہندی، تلگو، ملیالم، مرٹھی، اڑیہ، گجراتی، ہریانوی، آسامی، ٹلو اور بنگالی میں تقریباً دس ہزار گیتوں کی ریکارڈنگ کروائی۔

 میڈیا سے بات کرتے ہوئے ان کی ملازمہ نے کہا کہ آج صبح بزرگ اداکارہ نے دروازہ کی گھنٹی پر کوئی ردِعمل ظاہر نہیں کیا جس کے بعد انہوں نے پولیس کو اطلاع دی۔

 پولیس نے کہا کہ گرپڑنے کے بعد ان کے چہرے اور گردن پر نشان پڑ گئے۔ دواخانہ منتقلی کے دوران ان کی موت ہوگئی۔ حکومت نے جاریہ سال ان کے لئے پدمابھوشن ایوارڈ کا اعلان کیا تھا۔ وانی کی پیدائش 1945ء میں ہوئی تھی۔