نیتین یاہو جنگ بندی کے معاہدہ میں تاخیر چاہتے ہیں: حماس
اسرائیلی وزیر اعظم نیتن یاہو نے بھی کہا ہے کہ حماس غزہ میں جنگ بندی اور یرغمالیوں کی رہائی کے معاہدے کو روک رہی ہے اور اسرائیل نے اپنی شرائط میں کوئی تبدیلی نہیں کی ہے۔
غزہ: حماس تحریک کے رکن عزت الرشق نے انکشاف کیا ہے کہ اسرائیلی وزیراعظم بنیامن نیتن یاہو نے امریکی جنگ بندی کی تجویز میں نئی شرائط اور مطالبات شامل کیے ہیں۔
عزت الرشق نے کہا کہ اس سے ظاہر ہوتا ہے کہ نیتن یاہو ایک بار پھر کسی معاہدے تک پہنچنے سے روکنے، تاخیر کرنے اور بچنے کی حکمت عملی کی طرف لوٹ آئے ہیں۔
دوسری جانب اسرائیلی خفیہ سروس موساد کے سربراہ ڈیوڈ بارنیا غزہ کی پٹی کی صورتحال کو حل کرنے کے لیے روم میں ہونے والے اجلاس کے بعد واپس اسرائیل پہنچ گئے ہیں۔
دریں اثنا ،اسرائیلی وزیر اعظم نے کہا ہے کہ اہم مسائل پر مذاکرات آنے والے دنوں میں جاری رہیں گے۔ اسرائیلی وزیر اعظم نیتن یاہو نے بھی کہا ہے کہ حماس غزہ میں جنگ بندی اور یرغمالیوں کی رہائی کے معاہدے کو روک رہی ہے اور اسرائیل نے اپنی شرائط میں کوئی تبدیلی نہیں کی ہے۔
اسرائیل اصل تجویز کے اصولوں پر عمل پیرا ہے جس میں یرغمالیوں کی ممکنہ بڑی تعداد کو رہا کرنا، اسرائیل کا غزہ اور مصر کے درمیان سرحدی گزرگاہ کو کنٹرول کرنا اور ہتھیاروں اور فلسطینی عسکریت پسندوں کو شمالی غزہ کی پٹی کی طرف واپس جانے سے روکنا شامل ہے۔
