تلنگانہ

تلنگانہ میں تعلیم کی نئی صورت گری: کے ٹی آر

تارک راما راو نے اس خصوص میں ٹوئیٹ کرتے ہوئے کہا کہ تلنگانہ میں تعلیم کی صورت گری ہوئی ہے۔انہوں نے اس ٹوئیٹ کے ساتھ ایک ویڈیو بھی شئیر کیا جو راجنا سرسلہ ضلع کے گمبھی راو پیٹ کا ہے۔

حیدرآباد: حکومت تلنگانہ سرکاری اسکولوں اور کالجوں میں معیاری تعلیم فراہم کرنے کے لیے مساعی کررہی ہے۔ حکومت ہر طالب علم کو اعلیٰ تعلیم یافتہ بنانے کے مقصد سے ہر قسم کی سہولت فراہم کررہی ہے۔ ریاستی حکومت کے جی تا پی جی تعلیم نافذ کر رہی ہے۔

 تلنگانہ کے وزیر انفارمیشن ٹکنالوجی کے تارک راما راو نے اس خصوص میں ٹوئیٹ کرتے ہوئے کہا کہ تلنگانہ میں تعلیم کی صورت گری ہوئی ہے۔انہوں نے اس ٹوئیٹ کے ساتھ ایک ویڈیو بھی شئیر کیا جو راجنا سرسلہ ضلع کے گمبھی راو پیٹ کا ہے۔

انہوں نے کہاکہ ریاست بھر کے تمام اضلاع میں اس طرح کی سہولیات فراہم کرنے کا مقصدحکومت رکھتی ہے۔ اس ویڈیو میں بتایاگیا ہے کہ تلنگانہ ریاست کی تشکیل کے بعد وزیراعلی کے چندرشیکھرراو کی قیادت میں ریاست میں ہر طالب علم کو معیاری تعلیم فراہم کرنے کی کوششیں کی جارہی ہیں۔

 ”ہمارا گاوں۔ہمارا اسکول“ اسکیم کے حصہ کے طور پر راجنا سرسلہ ضلع کے گمبھی راو پیٹ میں تمام قسم کی سہولیات کے ساتھ ایک کے جی تا پی جی کیمپس تیار کیا گیا ہے۔

آنگن واڑی سنٹر، پری پرائمری اسکول، پرائمری اسکول، ہائی اسکول، جونیئر کالج اور ڈگری کالج 6 ایکڑ پر تعمیر کیے گئے ہیں۔ اس سکول میں 3500 طلباء زیر تعلیم ہیں۔ تلگو، انگریزی اور اردو میڈیم میں تعلیم کا انتظام کیاگیا ہے۔

 پری پرائمری اور پرائمری سکول 250 طلباء کے ساتھ کامیابی سے چل رہا ہے۔ کمپیوٹر، سائنس لیب، لائبریری اور اسکل ڈیولپمنٹ سنٹر کے ساتھ جملہ 90 کلاس رومس قائم کی گئی ہیں۔ ایک ہزار طلبہ کے لیے ایک ڈائننگ ہال کی سہولت فراہم کی گئی ہے۔ فٹ بال، کرکٹ، والی بال، کبڈی اور اتھلیٹکس کے لیے بھی اسٹیڈیم بنائے گئے ہیں۔