حیدرآباد

ایچ ایم ڈی اے کی نیلام کردہ اراضی کے پلاٹس کی رجسٹریشن میں رکاوٹ، 22 اے فہرست کا حوالہ دے کر عہدیداروں کا انکار

حیدرآباد میٹروپولیٹن ڈیولپمنٹ اتھارٹی (ایچ ایم ڈی اے) کی جانب سے موکیلا میں نیلام کیے گئے پلاٹس خریدنے والے افراد کو رجسٹریشن کے معاملے میں دشواریوں کا سامنا ہے۔ ریونیو عہدیداروں نے سروے نمبر 96/پی کی بعض اراضی 22 اے فہرست میں شامل ہونے کا حوالہ دیتے ہوئے پلاٹس کی رجسٹریشن سے انکار کردیا ہے۔

حیدرآباد: حیدرآباد میٹروپولیٹن ڈیولپمنٹ اتھارٹی (ایچ ایم ڈی اے) کی جانب سے موکیلا میں نیلام کیے گئے پلاٹس خریدنے والے افراد کو رجسٹریشن کے معاملے میں دشواریوں کا سامنا ہے۔ ریونیو عہدیداروں نے سروے نمبر 96/پی کی بعض اراضی 22 اے فہرست میں شامل ہونے کا حوالہ دیتے ہوئے پلاٹس کی رجسٹریشن سے انکار کردیا ہے۔

تفصیلات کے مطابق حیدرآباد سے شنکرپلی جانے والی اہم سڑک کے قریب واقع موکیلا میں ایچ ایم ڈی اے نے 165.37 ایکڑ اراضی پر 1,293 پلاٹس تیار کرکے ان کی نیلامی کی تھی۔ اس نیلامی میں پلاٹس کو بھاری قیمتوں پر فروخت کیا گیا تھا۔

اسی سلسلے میں حال ہی میں نیلام کیے گئے 100 پلاٹس کو خریداروں نے فی مربع گز 1,09,500 روپے تک ادا کرکے حاصل کیا تھا۔ کئی خریداروں نے کروڑوں روپے خرچ کرتے ہوئے یہ پلاٹس خریدے تھے اور انہیں امید تھی کہ نیلامی کے بعد رجسٹریشن کا عمل آسانی سے مکمل ہوجائے گا۔

تاہم اب رجسٹریشن کے مرحلے پر خریداروں کو غیر متوقع رکاوٹ کا سامنا ہے۔ ریونیو عہدیداروں کا کہنا ہے کہ سروے نمبر 96/پی کی بعض اراضی 22 اے کے تحت ممنوعہ جائیدادوں کی فہرست میں شامل ہے، جس کی وجہ سے رجسٹریشن نہیں کی جاسکتی۔

اس صورتحال سے پلاٹس خریدنے والے افراد میں تشویش پائی جاتی ہے۔ خریداروں نے سوال اٹھایا ہے کہ جب اراضی کی قانونی حیثیت اور رجسٹریشن سے متعلق مسائل موجود تھے تو ایچ ایم ڈی اے نے بھاری قیمتوں پر ان پلاٹس کی نیلامی کیسے کی؟

انہوں نے کہا کہ کروڑوں روپے ادا کرکے سرکاری ادارے کی نیلامی میں پلاٹس خریدنے کے باوجود رجسٹریشن سے محروم رکھنا افسوسناک ہے۔ اگر یہی صورتحال رہی تو عوام کا ایچ ایم ڈی اے اور حکومت پر اعتماد کیسے برقرار رہے گا؟

متاثرہ خریداروں نے حکومت اور ایچ ایم ڈی اے کے اعلیٰ عہدیداروں سے مطالبہ کیا ہے کہ وہ فوری مداخلت کرتے ہوئے مسئلہ حل کریں اور پلاٹس کی رجسٹریشن کے لیے اقدامات کریں۔

اس معاملے نے سرکاری اداروں کی جانب سے نیلامی سے قبل اراضی کے قانونی ریکارڈ اور رجسٹریشن سے متعلق امور کی جانچ پر بھی سوالات کھڑے کردیے ہیں۔