نائب صدر جمہوریہ کے انتخاب سے قبل اپوزیشن جماعتوں کی اہم میٹنگ

نئی دہلی : نائب صدر جمہوریہ کے انتخاب سے پہلے کانگریس کی آج اہم میٹنگ ہوئی جس میں نائب صدر جمہوریہ کے انتخاب سے متعلق مختلف امور پر تبادلہ خیال کیا گیا۔

میٹنگ میں کانگریس لیڈروں نے کہا کہ انڈیا الائنس کے لیڈروں کی میٹنگ پیر کے روز پارلیمنٹ ہاؤز کامپلکس میں بلائی جائے گی اور تمام لیڈروں سے درخواست کی جائے گی کہ تمام پارٹیاں انڈیا الائنس کے امیدوار کے حق میں ووٹ دیں اور انہیں کامیاب بنائیں۔

کانگریس کی میٹنگ میں پارٹی لیڈر پرمود تیواری، جئے رام رمیش اور متعدد دوسرے لیڈران موجود تھے۔ بی جے پی کی طرح ووٹ ڈالنے سے پہلے اپنے ممبران پارلیمنٹ کے لیے ورکشاپ منعقد کرنے کے سوال پر، کانگریس ذرائع نے کہا کہ اتحاد کی پارلیمانی پارٹی کے لیڈروں کی میٹنگ بلائی جا رہی ہے اور اس میں تمام لیڈران اپنے ممبران اسمبلی کو اجتماعی پیغام دیں گے۔

ذرائع نے بتایا کہ بہار میں سیٹوں کی تقسیم کے سلسلہ میں بات چیت ہوئی لیکن کہا گیا کہ نائب صدر کے انتخاب کے معاملہ پر کانگریس صدر ملیکارجن کھرگے کی موجودگی میں ہی غور کیا جائے گا۔ یہ اجلاس 9 ستمبر کو ہونے کا امکان ہے۔

قبل ازیں نائب صدر کے انتخاب کے لیے نمبروں کی کمی کے حوالہ سے ایک سوال پر کانگریس لیڈر پرمود تیواری نے کہا کہ نائب صدر جمہوریہ کے عہدے کے لیے انتخاب کسی انتخابی نشان پر مبنی نہیں ہے۔ یہ ضمیر کی آواز پر مبنی انتخاب ہے۔ سابق جج بی سدرشن ریڈی نائب صدر کے عہدہ کے لیے بہتر امیدوار ہیں اور امید ہے کہ لوگ ضمیر کی آواز پر انہیں ووٹ دیں گے۔