کہرے کی وجہ سے دہلی میں 80 سے زائد پروازیں منسوخ

نئی دہلی: دہلی کے اندرا گاندھی بین الاقوامی ہوائی اڈے پر گھنے کہرے کی وجہ سے اتوار کے روز اب تک 80 سے زائد پروازیں منسوخ ہو چکی ہیں۔

ہوائی اڈے کو ہفتے کی رات 8 بجے کے بعد کم وزیبلٹی کا عمل شروع کرنا پڑا، جو کہ آج صبح تک جاری رہا۔ ایئرپورٹ کی جانب سے سوشل میڈیا پر اطلاع دی گئی ہے کہ اب آپریشن معمول کے مطابق ہے۔

دہلی ایئرپورٹ کی ویب سائٹ کے مطابق آج 40 سے زائد روانہ ہونے والی پروازیں اور تقریباً اتنی ہی آنے والی پروازیں منسوخ رہیں۔ اس کے علاوہ کئی پروازوں میں تاخیر بھی ہوئی۔

شمالی ہندوستان کے دیگر حصوں سے بھی گھنے کہرے کی خبریں ہیں۔

واضح رہے کہ دہلی میں اس پورے ہفتے صبح کے وقت گھنا کہرا رہنے کی وجہ سے پروازوں پر خاصا اثر پڑا ہے۔