ڈبل بیڈروم مکانات میں غیرقانونی مقیم ہونے کی شکایت پر پولیس چوکس

حیدرآباد: سکندر آباد کے ماریڈپلی میں ڈبل بیڈروم کے مکانات حکومت کی جانب سے الاٹ نہ کرنے کے باوجود ان مکانات میں بعض افراد کے غیر قانونی طور پر مقیم ہونے کی اطلاع پر پولیس نے ریونیو حکام کے ساتھ مل کر جانچ شرو ع کردی۔

پولیس نے بیریکیڈس لگا کر اندر جانے کی اجازت کسی کو نہیں دی۔

ماریڈ پلی میں کچھ عرصہ سے خالی پڑے ڈبل بیڈروم کے مکانات پر غیر قانونی طور پر قبضہ کرنے اور وہاں رہنے کی شکایات موصول ہوئی تھیں، جس پر حکام نے خصوصی توجہ دی ہے۔

پولیس کی مدد سے ان افراد کو شناخت کرنے کی کوشش کی جا رہی ہے۔ ریونیو حکام نے واضح کیا کہ جو لوگ غیر قانونی طور پر وہاں مقیم ہیں، ان کے خلاف کارروائی کی جائے گی۔