پولیس کا سرچ آپریشن تیز، شاباد قتل کیس کے مرکزی ملزم کی تلاش جاری

حیدرآباد : رنگا ریڈی ضلع کے شاباد منڈل کے دیولہ گوڈا گاؤں میں پیش آئے سنسنی خیز چھ افراد کے قتل کے مقدمے کے مرکزی ملزم راج کمار کی گرفتاری کے لیے پولیس نے تلاش کا دائرہ وسیع کر دیا ہے۔ چیویلا کے ڈپٹی کمشنر آف پولیس (ڈی سی پی) یوگیش گوتم نے اتوار کو بتایا کہ ملزم کی تلاش کے لیے نو خصوصی ٹیمیں تشکیل دی گئی ہیں۔

ملزم کی گرفتاری سے متعلق گردش کرنے والی خبروں پر ردعمل ظاہر کرتے ہوئے ڈی سی پی نے واضح کیا کہ راج کمار اب بھی مفرور ہے اور عوام سے اپیل کی کہ وہ سوشل میڈیا پر پھیلائی جانے والی افواہوں پر یقین نہ کریں۔

انہوں نے کہاکہ "شاباد میں چھ افراد کے قتل کے معاملے کی تحقیقات تیز کر دی گئی ہیں۔ ریلوے پولیس، ٹریکنگ ٹیموں اور انسانی و تکنیکی تفتیشی یونٹوں سمیت نو خصوصی ٹیمیں ملزم کی تلاش میں مصروف ہیں۔ ہمیں شبہ ہے کہ وہ چیگورو ریلوے ٹریک عبور کرکے جنگلاتی علاقے میں فرار ہو گیا ہے۔ جمعہ کی رات 11 بج کر 47 منٹ پر اس کا موبائل فون بند ہو گیا تھا۔”

پولیس کے مطابق، ملزم نے مبینہ طور پر انتقام کی نیت سے یہ واردات انجام دی، کیونکہ اس کے خلاف ایک کم عمر لڑکی کو مبینہ طور پر ہراساں کرنے کے الزام میں پوکسو ایکٹ کے تحت مقدمہ درج کیا گیا تھا۔

پولیس کا کہنا ہے کہ راج کمار نے جمعہ کی دیر رات دیولہ گوڈا گاؤں میں دو خاندانوں کے چھ افراد کو مبینہ طور پر قتل کر دیا۔ مقتولین میں 17 سالہ لڑکی، اس کی والدہ چتیالا لکشمی (45)، دادی چتیالا رکما (65)، ملزم کی بیوی سرتھا (30) اور ان کے دو بیٹے، پری کشت (4) اور دوی کشت (2) شامل ہیں۔

اس ہولناک واقعے کے بعد ریاست بھر میں شدید صدمے اور تشویش کی لہر دوڑ گئی ہے۔