مسجد حرام میں افطاری کرنے کے خواہشمندوں کیلئے پورٹل جاری

ریاض: سعودی حکومت نے رمضان المبارک سے پہلے ایک ایسے پورٹل کا اجراء کیا ہے جس کے ذریعہ وہ تمام مسلمان آن لائن درخواست دے سکیں گے جو رمضان المبارک کے دوران افطار مسجد حرام میں کرنے کے خواہشمند ہیں۔

سعودی خبر رساں ادارہ کے مطابق اس افطار پورٹل کا اجراء سعودی حکومت نے اتوار کے روز کیا ہے۔

حرمین شریفین کے انتظامی امور سے متعلق اتھارٹی نے اس پورٹل کا اجراء حرمین شریفین میں افطاری کے معمول کو منظم کرنے اور زیادہ سے زیادہ لوگوں کو اس سلسلے میں سہولت دینے کے لیے کیا ہے۔ تاکہ ان کے لیے پیشگی انتظامات ترتیب دیے جا سکیں۔

یہ درخواستیں حرمین شریفین سے متعلق انتظامی اتھارٹی کی ویب سائٹ پر بھی دی جا سکتی ہیں۔ جس کے نتیجے میں افطاری کے خواہشمند مسلمانوں کی رجسٹریشن ہو سکے گی اور ان کے لیے اجازت نامہ جاری کیا جاسکے گا۔ نیز انہیں اس سلسلے میں مزید رہنمائی بھی دی جا سکے گی۔