تلنگانہ میں بلدیات کے اداروں کے انتخابات کی تیاریاں، بی جے پی سرگرم
اس سلسلہ میں آج پارٹی کے ریاستی دفتر میں ایک اہم مشاورتی اجلاس منعقد ہوا جس میں بی جے پی کے فلور لیڈر مہیشور ریڈی، رکن پارلیمنٹ ای راجندر، قومی جنرل سکریٹری سنیل بنسل اور تلنگانہ اُمور کے انچارج ابھے پٹیل شریک ہوئے۔
حیدرآباد: تلنگانہ میں کسی بھی وقت مقامی بلدیات کے اداروں کے انتخابات کی گھنٹی بجنے کی اُمید کے پیشِ نظر بھارتیہ جنتا پارٹی نے اپنی تیاریاں تیز کر دی ہیں۔
اس سلسلہ میں آج پارٹی کے ریاستی دفتر میں ایک اہم مشاورتی اجلاس منعقد ہوا جس میں بی جے پی کے فلور لیڈر مہیشور ریڈی، رکن پارلیمنٹ ای راجندر، قومی جنرل سکریٹری سنیل بنسل اور تلنگانہ اُمور کے انچارج ابھے پٹیل شریک ہوئے۔
اجلاس میں آنے والے بلدیات کے اداروں کے انتخابات کے لیے حکمتِ عملی، امیدواروں کا انتخاب اور پارٹی کے اندر پرانے اور نئے لیڈران کے درمیان موجود اختلافات پر بھی تفصیلی تبادلہ خیال ہوا۔ اطلاعات کے مطابق ای راجندر اور مہیشور ریڈی نے مطالبہ کیا کہ ریاستی کمیٹی میں اُن کے قریبی افراد کو مناسب نمائندگی دی جائے۔
ذرائع کے مطابق، بلدیات کے اداروں کے انتخابات کی مکمل ذمے داری ای راجندر کو سونپنے کا امکان ہے۔
آج دوپہر ایک ریاستی سطح کا ورکشاپ بھی منعقد کیا گیا جس میں انتخابات کے دوران اختیار کی جانے والی حکمت عملی اور منصوبہ بندی پر سنیل بنسل نے پارٹی لیڈران کو رہنمائی کی۔
اجلاس میں فیصلہ کیا گیا کہ ریاستی سطح کے ساتھ ساتھ زونل سطح پر بھی ورکشاپس منعقد کیے جائیں گی۔
متحدہ اضلاع کو ملا کر ایک زون بنایا جائے گا، اور ریاست بھر کو مجموعی طور پر 5 زونز میں تقسیم کیا جائے گا۔ ان زونز کی ذمہ داری منڈل سطح کے صدور اور سینئر کارکنوں کو دی جائے گی۔
اس دوران، چونکہ کینٹونمنٹ بورڈ کی میٹنگ بھی جاری تھی، اس لیے ایم پی ای راجندر سنیل بنسل کے ساتھ جاری اجلاس سے بیچ میں ہی روانہ ہوگئے۔
بی جے پی ذرائع کے مطابق، ریاست میں پارٹی کو مضبوط بنانے، بوتھ سطح تک کی تنظیمی طاقت کو متحرک کرنے اور کارکنوں کو انتخابات کے لیے تیار رکھنے پر مکمل توجہ دی جا رہی ہے۔
