فلک نماں ایکسپریس ٹرین میں دہشت گردوں کی موجودگی، مسافروں میں تشویش کی لہر دوڑ گئی

حیدرآباد: ہائی الرٹ کے دوران ہاؤڑا سے حیدرآباد آنے والی فلک نماں ایکسپریس میں پولیس اور حفاظتی اداروں نے اچانک تلاشی کارروائی کی۔ پولیس کو اطلاع ملی تھی کہ ٹرین میں ممکنہ دہشت گرد موجود ہیں۔

اطلاعات کے مطابق، گھٹکیسر اسٹیشن کے قریب ٹرین کو روک کر آر پی ایف، جی آر پی اور گھٹکیسر پولیس کی مشترکہ ٹیم نے ہر کارگو اور مسافر کی تفصیلی جانچ شروع کر دی۔ یہ کارروائی تقریباً آدھے گھنٹے تک جاری  رہی۔

پولیس نے مسافروں سے کہا ہے کہ وہ اپنے شناختی کارڈ یا دستاویزات ساتھ رکھیں تاکہ تلاشی کے دوران کسی مشکل کا سامنا نہ کرنا پڑے۔ حکام نے شہریوں اور مسافروں پر زور دیا ہے کہ وہ محتاط رہیں اور حفاظتی ہدایات پر عمل کریں۔

پولیس کا کہنا ہے کہ یہ کارروائی ٹرین کے راستے میں کسی بھی ممکنہ خطرے کو فوری طور پر روکنے کے لیے کی گئی ہے، اور مسافروں کی حفاظت ان کی اولین ترجیح ہے۔