پیپر لیک، بے روزگاری جیسے معاملوں کے خلاف 17 جون کو کوٹہ سے کانگریس مہم کا آغاز کریں گے راہل

نئی دہلی: کانگریس نے پیپر لیک، امتحانات میں بے قاعدگیوں اور بے روزگاری کے معاملے پر مرکزی حکومت کے خلاف ملک گیر مہم چلانے کا اعلان کیا ہے اور اس کی شروعات لوک سبھا میں اپوزیشن لیڈر راہل گاندھی 17 جون کو راجستھان کے کوٹہ میں منعقد ہونے والے اسٹوڈنٹ کنونشن سے کریں گے۔

کانگریس جنرل سکریٹری (تنظیم) کے سی وینوگوپال نے ہفتہ کو ایک بیان میں کہا کہ اس مہم کے تحت مسٹر گاندھی 17 جون کو کوٹہ، 10 جولائی کو الہ آباد، 11 جولائی کو پٹنہ اور 14 جولائی کو دہلی میں اسٹوڈنٹ کنونشن سے خطاب کریں گے۔

ان پروگراموں میں طلباء، مسابقتی امتحانات کے امیدوار، یوتھ تنظیمیں، ماہرین تعلیم اور امتحان کے گھپلوں سے متاثرہ لوگ حصہ لیں گے۔ انہوں نے کہا کہ پارٹی کی اسٹوڈنٹ یونٹ این ایس یو آئی، یوتھ کانگریس اور ریاستی و ضلعی یونٹس اس کے تعلق سے ملک بھر میں وسیع عوامی رابطہ مہم چلائیں گی۔

اس کے تحت تعلیمی اداروں، کوچنگ مراکز اور نوجوانوں کے درمیان پہنچ کر بات چیت کی جائے گی اور سوشل میڈیا اور ڈیجیٹل ذرائع کے ذریعے مہم کو وسیع بنایا جائے گا۔

کانگریس کا الزام ہے کہ مسلسل ہو رہے پیپر لیک، بڑھتی ہوئی امتحان فیس اور بھرتی کے عمل میں شفافیت کی کمی سے کروڑوں نوجوانوں کا مستقبل متاثر ہو رہا ہے۔ پارٹی نے کہا کہ وہ ان مسائل پر پارلیمنٹ میں وسیع بحث کا مطالبہ کرنے کے ساتھ ساتھ نوجوانوں کے مفادات کے تحفظ کے لیے ضروری قانون سازی کے اقدامات کی بھی وکالت کرے گی۔

واضح رہے کہ پارٹی نے جنرل سکریٹریوں، انچارجوں اور ریاستی صدور کی حال ہی میں یہاں ہوئی میٹنگ میں حکومت کی ان پالیسیوں کے خلاف ملک گیر مہم شروع کرنے کا اعلان کیا تھا۔