ریجنل پاسپورٹ آفس اضافی 7150 اپوائنٹمنٹس جاری کرے گا

حیدرآباد: زبردست مانگ اور اپوائنٹمنٹس کی دستیابی کیلئے طویل انتظار جیسے مسائل کے خاتمہ کیلئے ریجنل پاسپورٹ آفس حیدرآباد نے 15 تا 30 مئی کے درمیان 7150 سے زائد اضافی اپوائنٹمنٹس جاری کرنے کا فیصلہ کیا ہے۔ یہ اپوائنٹمنٹس، تمام پانچ پاسپورٹ سیوا کیندراس میں دستیاب رہیں گے۔

 ان کیندراس میں حیدرآباد کے تین (بیگم پیٹ، امیر پیٹ اور ٹولی چوکی) اور کریم نگر ونظام آباد کا ایک ایک کیندر شامل ہے۔ یہ اپوائنٹمنٹس تتکال، نارمل اور پولیس کلیئرنس سرٹیفکیٹس زمرہ کیلئے دستیاب رہیں گے۔

 اپوائنٹمنٹس ہر جمعہ اور چہارشنبہ کو 4:30بجے شام دستیاب رہیں گے جس کا آغاز جمعہ 12 مئی سے ہوگا۔ یہ اپوائنٹمنٹس، پورٹل پر www.passportindia.gov.in یا passportseva app پر دستیاب رہیں گے۔ ریجنل پاسپورٹ آفیسر داساری بالیا نے اپنے ایک پریس ریلیز میں یہ بات بتائی۔