باریک چاول کے بونس کے لئے 514 کروڑ روپے جاری

حیدرآباد: تلنگانہ کی کانگریس حکومت نے ریاست کے کسانوں کو بڑی خوشخبری سناتے ہوئے باریک چاول کے بونس کے لئے فنڈس جاری کر دیئے ہیں۔ حکومت نے پیر کے روز مجموعی طور پر 514.36 کروڑ روپے جاری کرنے کی منظوری دی ہے۔

واضح رہے کہ تلنگانہ حکومت نے ریاست میں باریک چاول کاشت کرنے والے کسانوں کو فی کوئنٹل 500 روپے بونس دینے کا وعدہ کیا تھا۔ اس تازہ فیصلہ کے تحت خریف کے سیزن میں باریک دھان فروخت کرنے والے تقریباً 2.17 لاکھ کسانوں کے بقایاجات ادا کئے جائیں گے۔

یہ بونس رقم مرکزی حکومت کی جانب سے مقرر کردہ اقل ترین امدادی قیمت کے علاوہ دی جائے گی۔ حکومت کی پالیسی کے مطابق یہ اسکیم صرف ان کسانوں کے لئے ہے جنہوں نے حکومت کی طرف سے متعین کردہ باریک چاول کی 33 اقسام کاشت کی ہیں۔

بونس کی حتمی رقم کا تعین دھان میں نمی کے تناسب اور اناج کے معیار کو مدنظر رکھ کر کیا جائے گا۔ گزشتہ کچھ عرصہ سے بونس کی ادائیگیوں میں تاخیر کی وجہ سے کسانوں میں تشویش پائی جا رہی تھی تاہم حکومت کے اس حالیہ اقدام سے انہیں بڑی راحت ملی ہے۔

زرعی ماہرین کا کہنا ہے کہ فصل کی بڑھتی ہوئی لاگت کے باعث مشکلات کا شکار کسانوں کے لئے یہ اضافی 500 روپے فی کوئنٹل ایک بڑا سہارا ثابت ہوں گے۔