سجنار نے منیجنگ ڈائرکٹر تلنگانہ آرٹی سی کی معیاد کے آخری دن عام مسافر کی طرح بس میں سفر کیا

حیدرآباد: تلنگانہ اسٹیٹ روڈ ٹرانسپورٹ کارپوریشن (ٹی جی ایس آرٹی سی) کے منیجنگ ڈائریکٹر کی حیثیت سے اپنے آخری دن سینئر آئی پی ایس عہدیداروی سی سجنار نے عوامی ٹرانسپورٹ سے اپنی گہری وابستگی کو ایک منفرد انداز میں ظاہر کیا۔ انہوں نے عام مسافر کی طرح سٹی بس میں سفر کیا۔

سجنار نے لکڑی کا پُل۔ٹیلی فون بھون بس اسٹاپ سے بس میں سوار ہوکر بس بھون (ٹی جی ایس آر ٹی سی ہیڈکوارٹرس) تک کا سفر کیا۔ کسی عہدیدار یا معزز شخصیت کی طرح نہیں بلکہ ایک عام مسافر کی طرح انہوں نے کنڈکٹر کو یوپی آئی کے ذریعہ کرایہ ادا کیا اور ٹکٹ حاصل کیا۔

سفر کے دوران سبکدوش ہونے والے منیجنگ ڈائرکٹر جن کو دو دن پہلے حکومت نے حیدرآباد کا کمشنرپولیس مقرر کیا ہے نے بس میں سوار دیگر مسافروں سے خوشگوار انداز میں گفتگو کی اور پبلک ٹرانسپورٹ سے متعلق ان کے تجربات اور خیالات کی سماعت کی۔

اپنی معیاد کے دوران سجنار نے مسافروں کی سہولت کے لیے کئی اصلاحات متعارف کرائیں، جن میں ڈیجیٹل ٹکٹنگ کے فروغ اور حفاظتی اقدامات کو مزید مستحکم بنانا شامل ہے۔