سکندرآباد ریلوے پولیس نے بین الریاستی گینگ کے دو ارکان کو گرفتارکیا

تلنگانہ : سکندرآباد ریلوے پولیس نے بین الریاستی گینگ کی اُس سازش کا پردہ فاش کر دیا جو غیر قانونی طور پر گانجا اسمگل کر رہا تھا۔ پولیس نے گینگ کے دو ارکان کو گرفتار کر کے ان کے قبضے سے 18.3 کلو گانجا برآمد کیا، جس کی مالیت تقریباً 9.14 لاکھ روپے بتائی گئی ہے۔

تلنگانہ جی آر پی کے ڈی ایس پی S. N. Javed نے بتایا کہ ملزمان اڈیشہ سے سکندرآباد تک Konark Express کے ذریعے گانجا لا رہے تھے۔ دونوں ملزمان کو سکندرآباد ریلوے اسٹیشن کے جنرل ویٹنگ ہال سے حراست میں لے کر پوچھ گچھ کی گئی۔

گرفتار شدگان کی شناخت اتر پردیش کے ابھیشیک سنگھ عرف گولو سنگھ (25) اور مغربی بنگال کے ابھیشیک کمار سنگھ (23) کے طور پر کی گئی ہے۔ ڈی ایس پی کے مطابق، تحقیقات میں یہ بات سامنے آئی ہے کہ مرکزی ملزم، جو اڈیشہ کا رہنے والا ہے اور جس کا نام دِگال بتایا گیا ہے، ہر ٹرپ کے عوض دونوں کو 15 ہزار روپے دینے کا معاہدہ کرتا تھا۔

پولیس کے مطابق، ملزمان اڈیشہ سے سکندرآباد گانجا لا کر دِگال کے بتائے ہوئے شخص کے حوالے کرنے کے لیے جنرل ویٹنگ ہال میں انتظار کر رہے تھے کہ اسی دوران انہیں گرفتار کر لیا گیا۔ اس کارروائی میں جی آر پی اور آر پی ایف کے اہلکاروں نے حصہ لیا۔